MF-BNU Asina Akordu ba Kartaun Debitu, Uza iha Rai Li’ur Featured

By Mariano Mendonca Maiu 20, 2023 510
Ministru Finansas (MF), Rui Augusto Gomes. Foto:Dok. Ministru Finansas (MF), Rui Augusto Gomes. Foto:Dok.

DILI: Ministériu Finansas asina akordu ho Banku Nasionál Ultramarinu hodi atribui kartaun kreditu debitu ne’ebé sei utiliza hodi halo pagamentu bainhira hala’o viajen ba rai li’ur.

Ministru Finansas (MF), Rui Augusto Gomes hatete, kartaun multi banku ida ne'e atu fasilita entidade sira bainhira viajen ba iha rai li'ur bele uza kartaun debitu bele halo pagamentu saida de'it.

"Asinatura ohin ne'e prátika adere ba kartaun multi banku, kartaun kreditu debitu husi viza nian ho Banku Nasionál Ultramarinu. Purtantu, bainhira ita halo viajen ba li’ur purezemplu ita halo pagamentu ruma ita la presiza ona lori osan iha saku laran bara-barak mais ita lori de'it kartaun," dehan nia hafoin asinatura akordu ho reprezentante BNU iha Ministériu Finansas, Kinta (18/05).

Ho kartaun ne’e, nia hatete, bainhira viajen ba rai li’ur atu selu otel, transporte ka konta ruma bele uza de'it kartaun debitu hodi halo pagamentu.

"Dala-barak ita halo transferénsia osan karun liu fali duke ita utiliza kartaun no kuandu ita utiliza osan transferensia se lakon ka orsida nia valor bele monu, tanba ne'e mak ita halo ida ne'e ho nune'e governu fasilita kartaun ne'e,” dehan nia.

Ba faze dahuluk, nia hatete, pelumenus entidade 89 mak sei adere ba kartaun ne’e.

"Ida ne'e so ba ofisial sira ba estranjeiru ka bele halo pagamentu ótel ka haan iha li'ur ka saida, duke dala-barak ita ba iha fatin balun, ita hasai ita-nia osan dollar ema la simu entaun tenke halai sai ba troka fali iha ruma, dala-ruma kalan boot ona susar entaun fó kartaun laiha problema par rezolve problema sira ne'e," dehan nia.

Rate this item
(0 votes)

Independente Digital TV