Tuir Motorista Gaudensiu Simâo hatete, Gazolina iha Postu abastamentu barak mak laiha ona, iha de'it fatin balun, maibé sira tenki ba forma naruk no hein kleur mak foin ense, Tanba ne'e sira deisde sosa de'it iha iha dalan ninin.
“Gazolina ne'ebé ami ense iha postu abastamentu folin la hanesan ho hola iha dalan ninin. Mina ne'ebé ami hola iha dalan ninin folin lahanesan ho ida ense lansung iha pertamina," dehan nia iha Hudi-laran Sesta, (09/07).
Nia dehan, antes ne’e sira sosa kombustivel ne’ebé negosiante sra faan iha dalan ninin, akua boot ida ho folin dolar amerikanu $2,50 no akua kiik ho folin $1,00, maibé agora negisiante sira faan akua boot folin sa'e ba dolar amerikanu $5.00 no balun $10 dolar, enkuantu akua kiik sa'e ba $3.00.
Enkuantu, tuir observasaun husi Online INDEPENDENTE iha terrenu haré katak, kombustivel iha Postu abastamentu Aitula Fuel's Komoro, 99 petro Station 2 iha Hudi-Laran, Mega Peteolium Fatu-Hada no Realistik Balide stok hotu.
No iha sentru abastamentu Mira-Mart Lda Ai-mutin la hatan ona komunidade sira ne'ebé loron jerigen ho akua hodi ense gazolina, maibé autoriza deit ba kareta sira ense dolar amerikanu $15 no motor sira ense deit $2,00 labele liu ida ne’e.
Nune’e mós iha postu abastamentu ETO Balide, motorista sira hahú forma husi dader oras ne’e, tanba deit atu ense mina.
Enkuantu, iha fatin refere Seguransa husi Polisia Nasionál Timor-Leste haruka fila-fali de'it komunidade sira ne'ebé lori akua ho jerigen atu sosa Gazolina.
