Livru ne’e la’ós de’it konta kona-ba líder ida, maibé tenta hatudu figura Kay Rala Xanana Gusmão hanesan símbolu unidade, luta no identidade nasaun Timor-Leste.
Molok tama ba prosesu imprime, Lamadi konvida diretamente Xanana atu haree livru ne’e iha Kompas, Jakarta.Vizita ne’e simu husi Vise Prezidente Kompas, Try Agung Kristanto, ne’ebé hato’o apresiasaun ba konfiansa ne’ebé fó ba sira atu publika obra refere.
“Ida ne’e onra boot tebes ba ami. Obrigadu ba Primeiru Ministru ne’ebé fó fiar mai ami,” dehan Try, ne’ebé Jornal INDEPENDENTE sita husi pajina ofisial PM Xanana, Sabadu (02/05).
Iha ambiente ne’ebé nakonu ho memória jornalístika, Xanana mós fila ba tempu uluk bainhira nia rasik hala’o knaar hanesan jornalista.
“Ha’u sente ondradu tebes. Bainhira Kompas hahú dezenvolve, ha’u mós hala’o knaar hanesan jornalista ho naran kódigu ‘Xanana’,” nia konta.
Ba Lamadi, istória ida ne’e la’ós apenas investigasaun ka dokumentasaun, maibé parte husi nia moris rasik.
Nia rekorda tempu iha tinan 1996 bainhira nia hela no hala’o estudu iha Dili, no relasaun ne’ebé nia halo ho komunidade Timor-oan sira.
Iha tempu ne’e, nia hetan apoiu husi ema Timor-oan sira, inklui Júlio Tomás Pinto, ne’ebé ajuda nia iha edukasaun no sai hanesan família ba nia.
Esperiénsia ida ne’e mak sai abut ba inspirasaun atu hakerek kona-ba Timor-Leste no lideransa Xanana.
“Tinan rua ha’u iha Amérika, depois ha’u fila mai no deside katak tenke hakerek livru kona-ba Timor. Ba ha’u, Xanana mak figura importante tebes,” dehan Lamadi.
Livru ne’e sai hanesan obra daruak autor nian kona-ba líder mundiál, no sei halo lansamentu iha tempu badak.
Iha livru ne’e, Xanana la’ós de’it lider polítiku, maibé hanesan narasaun ida kona-ba luta ba independénsia no esforsu atu hamutuk povu ida iha dalan unidade.
Durante vizita ne’e, média Kompas mós aproveita oportunidade atu halo entrevista ho Xanana kona-ba tema aktual, inklui aspirasaun Timor-Leste atu integra ba Association of Southeast Asian Nations.
Vizita ne’e akompaña husi delegasaun governu Timor-Leste, inklui Francisco Kalbuadi Lay, Gastão Francisco de Sousa no Expedito Dias Ximenes, hamutuk ho figura importante seluk.
Iha pájina sira livru ne’e nian, memória no luta ne’ebé uluk sai istória, agora moris fali—hanesan sasin ida kona-ba dalan naruk ida ne’ebé Timor-Leste liu hodi to’o iha unidade.
