Iha Kuarta (09/09) maizumenus tuku 17.10 Oras Timor-Leste (OTL), PNTL Munisipiu Dili halo identifikasaun membru PSHT ne’ebé foin fila husi Atambua, , iha area Kolmera, Dili.

Hafoin halo identifikasaun durante oras ida nia laran, PNTL konsege kaptura na’in 14, mane na’in 13 no feto ida.

Tuir informasaun, membru PSHT hirak ne’e sai husi Timor-Leste ba Atambua, Indonezia, iha 1 Agostu 2020 hodi sa’e sintu no fila fali mai TL iha 3 Setembru 2020.

Hafoin kaptura, PNTL evakua kedan ba Tasi Tolu hodi submete iha kuarentena.

Xefe Suku Kolmera Armenio Aleixa da Silva hatete, nia parte laiha koñesimentu ba ema na’in 14 ne’e ninia viajen ba Indonezia.

"Ohin seguransa sira iha ne'e, tanba informasaun tama iha kaza militar katak iha ha’u-nia joven sira iha Kolmera sai ba li’ur fila fali mai ilegal ne'e mak sira mai identifika, hamutuk ema na’in 14 iha duni ha’u-nia suku Kolmera,” dehan  Armenio iha Kolmera, Kuarta (09/09).

Nia dehan, nu’udar autoridade lokal nia laiha koñesimentu joven sira ne’e ba Atambua ho objetivu saida.

“Ba halo saida ami nu’udar autoridade lokal laiha koñesimentu, tanba sira ba ilegal no fila mai iha Timor Leste mós ho illegal,” dehan nia.

Entretantu, iha fatin ketak, Komandante PNTL Munisipiu Bobonaru, Superintendente Xefe Octavio Araúnjo Bucar hatete, ekipa konjunta husi Unidade Polisia Fronteira (UPF), Komandu Operasaun Espesial (KOE) no Falintil Forsa Defeza Timor-Leste (F-FDTL) kaptura membru PSHT na’in 43 iha postu Administrativu Maliana, Munisipiu Bobonaru.

Membru PSHT hirak ne’e foin fila husi Atambua hafoin tuir ezame sa’e sintu.

Membru PSHT hirak ne’e, nia dehan, kaptura iha 5 Setembru 2020, hafoin sira ba tuir ezame sa’e sintu iha Atambua, Indonezia.

“Membru PSHT sira ami intrega ona ba iha parte Ministeriu Saude (MS) hodi detein iha kuarentina Mota-ain, Batugade, durante loron 14, depois prosesu kontinua sei haruka ba iha Ministeriu Publiku mak bele foti desizaun iha tribunal,” dehan Octavio ba jornslista sira via telemovel, Kuarta (09/09).

Iha kapturasaun ne’e, nia hatete, ekipa konjunta mós prende atributu PSHT no rejistu ona iha komandu PNTL munisipiu Bobonaru hodi hein ba prosesu kontinuasaun iha ministeriu publiku.

Iha fatin ketak, portavoz Komandu Jerál PNTL Superintendente Xefe Arnaldo Araújo dehan, ema kontinua tama-sai ilegal iha fronteira, tanba iha fronteira ne’e luan, .

“Ema sira ne’e sempre buka oportunidade hodi bele hakat ba sorin, maibé seguransa iha fronteira metin tebes, bainhira hetan sei halo kapturasaun hodi prosesu sira tuir dala legal,” dehan nia.

Relasiona ho ameasa husi Covid-19, nia husu ba sidadaun sira atu kumpre regras hodi bele evita lori moras Covid-19 mai TL.

Bandu Lori Membru Foun ba Indonezia

Responsavel masimu PSHT Pedro Aparicio dehan, membru PSHT sira ne’ebé la kumpri regras iha situasaun estadu emerjensia laiha orientasaun husi organizasaun, tanba ne’e konsidera hanesan ilegal no tenke prosesu tuir lei ne’ebé vigora ona iha TL.

“Ami hanesan responsavel masimu ba iha PSHT ami laiha orintasaun ba sira, tanba iha fulan Juñu ami prepara dokumentu no fó avizu ba membru PSHT iha Timor laran tomak katak, governu reativa hikas ona artemarsiais iha Timor-Leste, tanba ne’e PSHT bandu atu lori membru foun ba tuir ezame sa’e sintu iha Indonezia, maibé sira la kumpri regra PSHT no kontra lei ne’ebé vigora iha Timor Leste tenke prosesu tuir dalan legal,” katak nia.

Nia afirma, regra organizaun PSHT fó sai ona katak, bandu atu lori membru foun husi Timor-Leste ba Indonezia no labele treinu subar.

Lere husu Fó Sansaun

Xefe Estadu Maiór Falintil Forsa Defeza Timor-Leste (F-FDTL) Maijór Jenerál Lere Anan Timur husu ba governu fó sansaun ba membru PSHT ne’ebé kontinua tama illegal ba Indonezia.

“Hanesan foin dadauk sira kuaze 50 ital ka 60 ital, sira tenta atu tama husi dalan ilegal, maibé ita-nia forsa sira ho UPF kaer kuaze 20 no sira restu ne’e halai fila, entaun sira ne’ebé mai agora iha hela kuarentena, depois kuarentena ne’e nusa husik ba uma ka governu tenke toma sansaun ruma, ida ne’e mak governu tenke haree ida ne’e,” dehan Lere hafoin enkontru semanál ho Prezidente Repúblika Francisco Guterres Lú Olo iha Palasiu Prezidensiál Bairu-Pite, Kuarta (09/09).

Tuir Lere, iha medida kastigu administrative barak ne’ebé bele fó ba sira ne’ebé kontinua kontra lei no regras.

“Kastigu medida administrativu ne’e barak, bele ba Bekora, bele halo saida ne’e, hanoin katak ne’e depende maibé, ha’u husu atu labele viola beibeik ita-nia liña fronteira ne’e, pior liu bainhira ita moris iha situasaun ida Covid-19 ne’e,” dehan nia.