“Sentru votasaun ne'ebé iha potensiál ba konflitu komandu sei koloka membru unidade balun hodi reforsa seguransa maibé lori arma,” dehan nia, iha Kuartél Jerál PNTL, Kaikoli-Dili, horisehik.
Alende ne’e, nia reforsa katak bainhira sentru votasaun ne'ebé iha área izoladu, PNTL sei destaka membru sira hodi apoiu másimu ba seguransa ba eleisaun nian.
Komisáriu Faustino hatutan, komandu PNTL liu husi komandu operasaun nia planu sei koloka membru polisia kontinjente tomak, alende ne’e departamentu Forsa Rezerva ho Unidade Espesiál ne’e apoiu bainhira situasaun difisil nia laran.
“Ita sei aumenta membru UEP iha Munisípiu balun ne'ebé sai potensiál ba konflitu,” tenik nia.
CNE dekreta ona katak sentru votasaun nivel nasionál iha territóriu Timor laran tomak hamutuk 690, maibé estasaun votu 900-resin.
Relasiona ho númeru estasaun votu ne’e komandu PNTL liu husi komandu operasaun sei koloka membru Polisia sira tuir estasaun votu ne'ebé rejistu ona.
Faustino akresenta katak, komandu sei halo redusaun ba fatin sira ne’ebé ladún poténsia konflitu. Nune’e, munisípiu ne'ebé identifika sempre iha poténsia ba konflitu sei hasa’e membru hodi asegura.
