"Ami iha Professor ho idade reforma, maibe to’o agora seidauk reforma no kontinua hanorin," Diretór Jerál Administrasaun Finansas MEJD, Antoninho Pires hateten iha MEJD, Segunda (25/07/2022).
Professór sira seidauk halo karta ba MEJD hodi reforma tanba governu seidauk iha lei rasik hodi fo obrigatóriu ba reforma, maibé balun hatama ona rekerimentu no balun seidauk.
Kompromisiu governu liu husi MEJD nian iha tinan ida ne'e, tenke hadi'a estatutu Professór kontratadu na’in 4.900-resin.
Professór voluntáriu sira iha tinan 2021, MEJD halo ona verifikasaun ba territóriu nasionál, ba iha eskola 500-resin, ne'ebé mak aprezenta ona proposta ba MEJD.
HO ida ne'e maka MEJD verifika duni lista ba professór voluntáriu hamutuk na’in 2.900-resin.
Husi númeru ida-ne'e, agora daudaun sei iha hela prossesu ida atu halo rekrutamentu hodi halo kontratu ba vaga ne'ebé mak MEJD prepara.
Molok ne'e, Diretór Nasionál Rekursu Umanu MEJD, Jacinto Varela informa ona katak MEJD rejista profesór ho idade reforma ka tinan 60 ba leten, hahú hosi tinan 2000 to’o agora hamutuk na’in 2.060, to’o oras-ne’ee sei kontinua serbisu.
Bazeia ba lei númeru 6/2012 no dekretu-lei númeru 23/2012, funsionáriu hotu iha MEJD iha rejime rua hanesan rejime jerál ba funsionáriu administrasaun no rejime espesiál ba profesor sira.
