Iha ambitu seremonia asinatura MoU, tersa (4/5), Ministru Edukasaun Juventude no Desportu (MEJD), Armindo Maia hatete, MoU ida ne’e mai husi Record Of Discussions entre SEJD ho KOICA ne’ebé molok ne’e asina husi SEJD no Director KOICA nian iha loron 21 fulan-agostu tinan 2020, iha kampu Demokrasia Dili, tanba ne’e atu formaliza konkordansia ne’ebé parte rua konseitu ona iha termus referensia.

Ho nune’e, projetu ne’e hare liu ba kooperasaun atu hari’i sentru futebol juvenil Bekora no reabilita kampu komunitaria 3 iha Dili laran hanesan, Kampu Bintan Bidau, Kampu Futebol Kampu Alor no Kampu Futebol Malinamuk Komoro.

Armindo Maia saliente katak, termus referensia ida ne’e, MEJD sei aprezenta ba Konsellu Ministru hodi halo apresiasaun no aprova.

“Tinan ne’e nia laran, KM halo apresiasaun no deside atu halo akordu ida ho KOICA liu husi Memorandu Intedimentu ida ba projetu ida ne’e, iha ne’ebá KM mós deside hodi delega poder ba asina MoU ida ne’e ho MEJD,” dehan nia iha salaun MEJD Vila-Verde, (04/05).

Nia dehan, Timor-Leste nia politika ba projetu kooperasaun Internasionál sira iha TL nia Aid Policy, desizaun ba projetu sira hotu ne’ebé mak ho orsamentu liu millaun $5 kompetensia KM nian, tanba valor husi projetu kooperasaun ida ne’e ho orsamentu millaun $6.5 ne’e mak presija duni deliberasaun no desizaun husi KM.

Orsamentu ne’e atu harii Sentru no hadiak kampu sira, projetu kooperasaun ida ne’e mós sei fornese akipamentus desportiva sira ne’ebé nesesariu ba fasilidade desportu hirak ne’ebé projetu kooperasaun ida ne’e harii no reabilita.

Armindo hateten, tuir akordu ne’e sei iha mós apoiu husi nasaun Korea ba formasaun treinamentu futeból juvenil sira no mós peritu balun atu ajuda elabora manual ba liga annual futeból juvenil ba labarik ho tinan 11-16 ba leten.

Nia haktuir katak, Governu Timor-Leste sei hari’i ekipa interministerial ida atu tau matan ba jestaun implementasaun projetu kooperasaun ida ne’e, hafoin prosesu konstrusaun no rehabilitasaun sira remata sei sai haktuir Governu Timor-Leste nia responsabilidade atu garante manutensaun no sustentabilidade fasilidade no ekipamentus domisilariu.

 Governu Timor-Leste liu husi Sekretariu Estadu Juventude no Desportu mak sei kobre hotu kustu ruma kona-ba desalfandegamentu, sei iha duni kustu desalfandegamentu ba meterial ne’ebé mak tama iha implementasaun ne’e.

Asisten Editór: Saturnina da Costa