Estadu Emerjénsia ne’ebé agora renova, abranje territóriu nasionál tomak no sei vigora hahú iha tuku 00:00 loron 30 fulan-Setembru no sei termina iha tuku 23:59 loron 29 fulan-Outubru tinan 2021.

“Kona-ba medida sira ezekusaun deklarasaun estadu emerjénsia anteriór nian, rejista alterasaun tolu, nune’e estabelese katak, se mak kompleta ona vasinasaun no mai ka tranzita iha país sira ne’ebé iha variante delta husi SARS-COV-2, atu tama iha territóriu nasionál, tenke aprezenta rezultadu negativu teste ba Covid-19 nian, hala’o kuarentena loron rua no hafoin períodu ne’e, hala’o fali teste diagnóstiku Covid-19 nian no prazu máximu oras 48 hafoin to’o iha país tenke halo teste foun diagnóstiku Covid-19 nian,”dehan Ministru Prezidensia Konsellu Ministru, Fidelis Leite Magalhães, iha Palasiu Governo, kuarta ne’e (29/09).

Aleinde, iha eventualidade okorrénsia surtu Covid-19 iha kualkér parte país nian obriga indivíduu sira hotu ne’ebé hela iha Timor-Leste atu realiza ezame médiku diagnóstiku Covid-19 ka aprezenta sertifikadu vasinasaun kompleta.

Nune’e, mós ba funsionáriu sira hotu administrasaun públika nian tenke simu vasina kontra Covid-19.

Entretantu, regra sira seluk mantein, liu-liu obrigasaun ba indivídu sira hotu ne’ebé hela iha Timor-Leste atu mantein distánsia, pelumenus metru ida ho ema seluk ne’ebé mak la hela hamutuk.

Kontinua iha obrigasaun mós atu utiliza máskara oin nian, ne’ebé taka inus no ibun, bainhira hakarak tama ka hela iha fatin públiku ka privadu hirak ne’ebé ema hotu uza, no fase liman bainhira hakarak tama ba estabelesimentu komersiál, industriál ka prestasaun servisu sira, ka ba edifísiu sira iha ne’ebé servisu administrasaun públika nian funsiona.

Enkuantu, durante vijénsia estadu emerjénsia, lisensa, autorizasaun, vistu no autorizasaun rezidénsia no aktu administrativu sira seluk sei válidu nafatin, la depende ba ninia prazu validade.