Tuir Manager Komunikasaun G7+ Helche Silvester hatete, durante ne’e, haree jornalista sira barak seidauk iha koñesimentu kle’an kona-ba servísu G7+, no mós saída mak G7+ nia lala’ok rasik.
“Entaun ami haree katak ida ne’e, ami presiza servísu hamutuk ho Konsellu Impresa atu nune’e bele desain buat sira ne’e, bainhira jornalista sira atu tun ba terenu partisipa iha aktividade g7+ sira nian ita boot sira bele fó sai notísia ka informasaun ne’ebé mak loos kona-ba servisu g7+.” dehan nia ba jornalista sira iha salaun G7+ Palasiu Governu, Sexta (09/02).
Nia dehan, tanba iha persepsaun barak ne’ebé mak sai la’o sai ema ne’ebé mak halo reportajen ka notísia iha sosiál média katak iha Timor mós G7+ iha hotu.
“Bainhira ita hatene katak membru g7+ iha nasaun rua-nulu (20) no Timor inklui mós nasaun iha membru ida husi nasaun rua-nulu, ne’e mak ohin loron ita mai halibur iha ne’e hodi fahe fali informasaun ba kolega média sira kona-ba servísu prioridade no mós hatan perguntas ka dezafius sira ne’ebé kolega média sira iha durante ne’e.” hatete nia.
Iha fatin hanesan, Prezidente Konsellu Impresa (KI) Otelio Ote hatete, hakarak dudu nafatin média sira liu-liu jornalista sira atu aprende loron ba loron, tanba hatene katak jornalista nia moris loron-loron mak informasaun.
‘‘Ita okupa informasaun iha téknika, maibé ita mós tenki iha kapasidade intelektuál iha informasaun barak, ida ne’e mak importánsia barak saída mak ohin ha’u dehan ne’e.’’ afirma nia.
Nia adianta, jornalista ema umanu ida, los duni loron-loron ba buka informasaun, halibur informasaun hakerek edita publika ba públiku liuhusi meius komunikasaun sosiál ne’e mak jornalista.
Maibe la para iha atividade ne’e deit, jornalista rasik tenki hatene kadi nia konesementu kadi nia matenek kadi nia profesionalizmu, bainhira nia apresenta konteúdu jornalístiku karik iha sira-nia meus komunikasaun sosiál, ema seluk intende no mós lalais.
“Segundu ita hatene G7+ mak organizasaun inter-governmentál hanesan nia misaun importante mak introdúz Timor tomak no mós paz ba mundu, entaun ita hanesan jornalista ida ne’ebe moris iha nasaun timor leste agora mos tama kategoria frazil” esplika nia.
Nia afirma, presija atu hamutuk iha ne’e para hodi intende rona ema nia esplikasaun intende di’ak kona-ba kondisaun ida frazíl oinsá, no saída mak média nia papél atu ajuda nasaun ida frazíl.
