Profesór 2.235 agora daudaun foin maka prosesa hotu. Komisaun Funsaun Públika mós verifika hotu ona no agora tama ona finansas atu selu iha fulan Juñu-Jullu nia laran, ba sira ne’ebé hetan pontifikadu ka diploma iha 2014 maka foin hetan kursu komplementár foin 2015-2016 foin maka hetan avaliasaun.

“Tinan rua ne’e maka hetan muitu bom ka di’ak liu 2017, agora foin prosesa no 2018 foin maka bele hetan osan ida ne’ebé progresu ba eskalaun,” dehan Diretór Jerál Ministériu Edukasaun (ME) Antoninho Pires, iha kna’ar fatin, Vila Verde, horisehik.

Nia dehan, tuir lei atu halo avaliasaun ba karreira profesór sira nu’udar Funsionáriu Públiku (FP) hodi aumenta sira nia eskalaun, sei avalia depende ba sira nia komportamentu servisu ne’ebé di’ak.

Antoninho dehan, kada tinan ME haree ba progresu karreira depende ba profesór idak-idak ninia komportamentu ne’ebé regula tuir regulamentu FP nian.

Prosesu atu halo hasae eskalaun profesór sira nian tenke halo avaliasaun tuir sira nia dezempeñu servisu di’ak ou la di’ak sei halo kada tinan rua.

Dekretu lei ka rejime ne’e foin maka estabelese iha 2014, entaun depois dekretu lei ne’e estabelese maka halo avaliasaun ba iha profesór sira iha terrenu, komesa 2001 to’o mai 2015.

Komesa husi ne'ebá mai maka foin konta kada profesór ida-idak ninia progresu karreira. Nia fó ezemplu kuandu 2011 hetan muitu bom ka di’ak liu no 2012 hetan nafatin muitu bom ka di’ak liu, entaun 2013 maka prosesa eskalaun sa'e.

Nia dehan, durante tinan 2013-2014 sira avalia profesór barak iha TL hetan progresu muitu bom ka di’ak liu hodi aumenta sira nia eskalaun no governu bele haree hodi aumenta sira nia osan ka saláriu kada fulan.

Tuir nia, iha periódiku TL nia ukun-aan, ME halo avaliasaun ba profesór iha territóriu TL hamutuk ema na’in rihun liam resin maka hetan progresu hodi aumenta sira nia eskalaun.