“Notísia ne’e la bazeia ba faktu reál. Fonte sira ne’ebé blog ne’e foti mesak imajinativu, katak ema sira ne’ebé mosu iha notísia ne’e la halo deklarasaun hanesan hakerek iha notísia ne’e”, dehan Prezidente Konsellu Imprensa, Virgílio da Silva Guterres, iha edifísiu KI, Kintál-Boot, horisehik.
Tanba ne’e, nia sujere ba jornalista sira labele uza notísia falsu sira ne’e nu’udar referénsia ba sira nia pergunta ba fonte sira durante kampaña. Labele fó informasaun ba públiku ne’ebé bazeia ba fonte ne’ebé falsu.
Prezidente KI apela ba jornalista hotu-hotu atu nafatin kumpre kódigu étika jornalistika hodi tranzmite produtu jornalistiku ne’ebé garante independénsia editoriál no respeita direitu públiku nian atu hetan informasaun ne’ebé loos no momoos.
Nia hatutan, objetivu husi kobertura média kampaña eleitorál, atu hasa’e partisipasaun sidadaun nian iha eleisaun jerál. Tanba ne’e, sidadaun sira tenke hetan informasaun ne’ebé klaru kona-ba programa partidu polítiku no kontestante sira nian, hodi hola desizaun molok ba vota.
Virgílio mós husu atu órgaun komunikasaun sosiál sira labele sai tranzmisór diskursu ódiu (hate speech) ba públiku. Diskursu ódiu ka vingansa polítika la'ós parte husi liberdade imprensa no liberdade espresaun.
Relasiona prosesu eleisaun tomak, husu mós ba Komisaun Eleisaun Nasionál (CNE) no Sekretariadu Téknika Administrasaun Eleitorál (STAE) atu fó biban no espasu nafatin ba kanál média no jornalista sira atu asesu ba informasaun hotu-hotu ne’ebé iha relasaun ho atividade eleisaun parlamentár ho ekilíbriu.
Konsellu Imprensa hato’o mós apresiasaun ba kanál média sira ne’ebé fó pájina no espasu espesiál ba partidu polítiku hotu-hotu hodi hato’o sira nia programa durante períodu kampaña polítika maski ho limitasaun oioin.
Rezultadu monitorizasaun provizóriu no analiza média Konsellu Imprensa nian hatudu katak, kanál média no jornalista balun tau sira ninia opiniaun rasik iha notísia laran, foka liu ba liafuan sira ne’ebé lider partidu polítiku sira uza hodi ataka malu no iha tendénsia halo kampaña ba partidu balun.
