Tanba ne’e, posibilidade Milleniun Challenge Account Timor-Leste, Instituto Publico sei harii sentru formasaun id aba professor sira.
Ministra Edukasaun Dulce de Jesus Soares, hatete, enkontru ne’e kontinuasaun deit ba enkontru sira antes hodi koalia kona ba posibilidade sei hetan ápoiu husi MCA ba Ministeriu Edukasaun atu hari sentru formasaun ba professor sira ho kualidade.
Ministra afirma, sentru formasaun refere sei harí besik iha eskola sira atu nunee bainhira iha formasaun, manorin sira kontinua ho prátika.
“Ami hanoin hela katak iha posibilidade formasaun ida ne’e sei liga ho eskola ruma atu nune’e bainhira iha formasaun au mezmu tempu manorin sira hala’o prátika iha eskola sira,” dehan nia iha Sala VIP, Ministeriu Edukasaun, Kinta (26/10).
Governante esplika, formasaun refere sei iha oin rua, ida ba manorin sira ne’ebé hanorin ona no ida seluk ba kandidatu manorin sira iha futuru, atu nune’e, ema ne’ebé hakarak sai manorin tenki iha preparasaun diak iha formasaun nian.
“Iha formasaun ne’e foku liu metodolojia sira oinsá atu hanorin no atu sai manorin ne’ebé diak, manorin sira ne’ebé atu hanorin tenki iha duni área graduadu nian, ezemplu hanesan se hanorin matemátika gradua duni iha área matemátika, atu nune’e reforsa nia ho disiplina atu hanorin diak liu tan,”tenik Ministra.
Iha Fatin hanesan, Kordenadór MCA-TL Constancio Pinto hatete, dadaun ne'e sei halo estudu jeotékniku ba rai ne'ebé atu harí sentru formasaun bá, tan ne'e bainhira la'os los ona hafoin bele hala'o formasaun.
"Formasaun ne'e ba lideransa eskola nian no tékniku informasaun, tanba ita hakarak transforma ita nia manorin sira hodi uza téknolojia," dehan Kordenadór MCA-TL.
Enkuantu, formasaun ne'e sei oferese ba manorin sira iha teritoriu laran tomak.
