Vise Ministru Komersiu no Industria, Agusto Junior Trindade informa, governu fó subsidiu ba kompaña importadór sira atu hatuun folin foos kilograma 20 ba $9 nune’e empreza kiik sira ne’ebé sosa tutan bele fa’an fali ho folin $10.
"Ami hahú halo monitorizasaun atu fó serteza katak foos tenke to’o duni iha area remota sira ho presu ne'ebe tuir dekretu lei iha, foos hotu-hotu kilograma 20 iha primeira mão (kompaña importadór) ne'e $9 dollar," informa Agusto bainhira halo monitorizasaun iha kompaña importadór, Kreatif Furak, iha area Hudi Laran, Kinta (26/10).
Bainhira kompaña importadór hatuun folin ba $9, nia dehan, empreza kiik sira ka loza sira ne’ebé sosa bele fa’an ho folin $10.
"Subsidiu ne'e par atu ajuda kompradór (komunidade) sira bainhira sira atu ba kompras foos kilograma 20. Se sira iha $10 dollar bele sosa ona tanba restu ne'e governu kobre tiha. Mais se presu normal, sira tenke iha $13.50 sentavus mak ba sosa, mais agora lae, sira iha $10 dollar bele sosa ona," dehan nia.
Kuotas ne'ebé governu fó ba kompaña importador iha konsumu nasioál ba fulan Outubru hamutuk 12,500 sakas. Signifika kada kompaña ho kuotas 2.500 sakas.
Ba total orsamentu ne'ebé prevee ba subsidiu iha fulan Outubru, nia dehan, se kompaña iha kapasidade atu distribui hotu foos bazeia ba kuotas ne’ebé iha, signifika kompaña importadór ida sei hetan $10.000.
"Depois ita haree kapasidade kompaña nian ne'ebé fornese ba komunidade ne'e hira, husi ne'e mak ita vezes (kali) orsamentu hira mak ita subsidia ba," dehan nia.
Ba kriteria, nia dehan, kompaña importadór sira prepara formulariu atu empreza kiik ka loza sira mai sosa tenke priense nune’e bele evita monopoliu ba folin.
Iha fatin hanesan, Jestór kompaña Kreatif Furak, Atica Moniz Carvalho hatete, nia kompaña hahú ona fa’an foos kilograma 20 ho folin $9 kada saka.
"Governu fó subsidiu ba ami ne'e ami iha (foos) 2.500 sakas ne'e hotu governu dehan para ona depois mak hein fali, ne'ebé 20 kilograma ami faan ho $9 dollar," dehan nia.
Iha seluk, Jerente kompaña Perisos, Jong Fu Kong hatete, nia parte hahú ona fa’an foos kilograma 20 ho marka Amor de Familia ho folin $9.
Ba empreza ka loza kiik ne’ebé hakarak sosa foos iha Perisos, nia hatutan, tenke iha lisensa husi Serve no tenke mós hatama kopia kartaun eleitoral hafoin kompaña bele fornese.
Ba individu ne’ebé hakarak sosa foos iha Perisos, nia dehan, bele, maibé ho folin $10.
Entretantu, iha 17 Outubru ne’e, Ministru Prezidensia Konsellu Ministru no Ministru Koordenadór Asuntu Ekonomiku interinu, Hermenegildo ‘Agio’ Pereira, asina akordu ho empreza importadór lima.
Tuir komunikadu imprensa ne’ebé Jornal INDEPENDENTE asesu, horseik, Ministru Agio asina akordu ho empreza Perissos Victoria Lda, Loja Creative Furak Lda, Lisun Importação no Exportação Lda, Jusibel Unipessoal Lda, no Alfa Dili Unipessoal Lda, hodi implementa intervensaun temporária ba estabilizasaun folin foos iha merkadu.
"Ministru Prezidénsia Konsellu Ministrus, hanesan Ministru Koordenadór Asuntus Ekonómikus ein ezersísiu, ohin (horseik), asina ona akordu lima ho empreza importadora aihan nian sira, hodi implementa intervensaun temporaria ba estabilizasaun folin foos iha merkadu, iha serimónia ida ne’ebé hala’o iha Palásiu Governu," informa komunikadu husi gabimete Prezidensiá Konsellu Ministru, Tersa (17/10).
Komunikadu ne’e hatete, akordu ne’ebé selebra ona ho objetivu atu asegura presu foos importadu, ne’ebé faan iha armajen empreza nasionál nian ne’ebé faan kuantidade boot, hodi fiksa ho montante másimu dolar amerikanu $12 ba kada saku ka parsela 25 kg, atu permite faan rahun foos ho folin masimu $0,50 sentavus kada kilograma.
“Hodi kumpre limite presu másimu ida ne’e, empreza nasionál sira ne’ebé faan foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór dollar amerikanu $5 kada saku ka parsela 25 kg, ne’ebé korresponde ho sentavus $0,20 ba kada kilograma foos nian.”
Atu hetan subsídiu ne’e, komunikadu ne’e dehan, empreza tenke submete pedidu pagamentu, akompaña ho kópia ne’ebé hetan autentikasaun husi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei númeru 76/2023, loron 29 fulan Setembru, ne’ebé estabelese medida ida ne’e.
