Reprezentante Mate Restu 12 Novembru Bartolomeu de Carvalho hatete, sira nia parte apoiu Estudante Universitariu Timor-Leste hodi ezize ba Parlamentu Nasional atu halakon lei pensaun vitalisia no mós regalia sira, inklui altera lei manifestasaun nian no mós redus osan viajen ba estranjeiru, nune’e aloka ba iha setór produtivu sira.
“Sira ne’ebé reprezenta povu tenke halo sira nia funsaun ho lolos, tenke rona aspirasaun husi povu, ne’e mak deputadu no dehan reprezentante povu, sé sira halo buat ne’ebé la los, ne’e la’ós reprezenta povu,”dehan Mate Restu 12 Novembru, iha ambitu manifestasaun loron datoluk, ne’ebé organiza husi EUTL, iha Resintu UNTL Sentral, Dili, Kuarta (17/09/25).
Nia dehan, Mate Restu 12 Novembru la aseita ho desizaun sira ne’ebé deputadu sira foti, tanba la reprezenta povu nia moris.
Nune’e, sira mós preokupa tanba sira nia maluk ne’ebé lakon vida iha masakre 12 Novembru, kuaze atus tolu resin to’o agora seidauk hetan sira nia isin no ruin.
Entretantu, ezizensia ne’ebé manifestante sira ezize ba PN maka halakon lei pensaun mensal vitalisia, altera lei manifestasaun nian, redus osan viajen ba estranjeiru hodi aloka ba iha setór produtivu sira.
Enkuantu, ezizensia seluk maka kona ba hapara sosa tan kareta foun ba deputadu sira, maibé ezizensia ida ne’e deputadu sira responde ona no aprova ona rezolusaun ida ba iha kanselamentu akizasaun viaturas ba deputadu sira iha Parlamentu Nasional.
