Nune’e, iha diálogo entre Portavós Estudante Universitariu Timor-Leste ho deputadu sira iha Parlamentu Nasional, ne’ebé la’o durante besik oras tolu nia laran, iha sala konferensia PN, kuarta ne’e (17/09), mosu kritika maka’as husi portavós sira liga ho preokupasaun ne’ebé durante ne’e povu enfrenta.

Nune’e, hafoin oras mós la’o ba dadaun, estudante sira nafatin hato’o ezizensia sira no ikus mai deputadu sira husi bankada lima ne’e aseita ona atu halakon lei pensaun vitalisia ne’ebé kada fulan atribui ba deputadu sira.

Maibé tenke liu husi lider bankada no mós plenaria, tanba desizaun hotu tenke liu husi plenaria.

Maske nune’e, Prezidente Parlamentu Nasional Interinu, Deputadu Alex sandrono Afonso Nunes hatete, nia parte apresia ba reprezentante manifestante sira nia kritika, maibé tenke kritika ho konstrutivu.

“Em nome depuadu sira ha’u apresia tebes ba ita boot sira,”dehan PPN interinu, iha sala konferensia PN, Kuarta (17/09).

Nia dehan, bankada lima pronunsia ona katak atu halakon lei pensaun vitalisia. Nune’e, tuir mai, sei liu husi lider bankada no sei lori ba plenaria, hodi deside.

Ho desizaun ne’e, halo Reprezentante Manifestante sira la konkorda, no aumenta sira nia emosaun. Tanba tuir sira, prosesu hotu kleur bainhira lori ba iha lider bankada no plenaria hafoin deskute no deside.

Nune’e, sira nafatin ezize atu tenke iha akordu ida entre parte rua, nuudar baze legal ida katak, Parlamentu Nasional aseita atu halakon lei pensaun vitalisia.

Prezidente Bankada KHUNTO, Antonio Verdial de Sousa Gama hatete, husu ba deputadu sira atu konkorda halo akordu ida, nune’e solusiona ezizensia hirak ne’e.

Deputada Bankada FRETILIN, Nurima Ribeiro Alkatiri hatete, tenke iha akordu ida atu nune’e bankada opozisaun mós garantia.

“Ha’u hanoin la susar atu prezidente interinu halo akordu ida, meza nia asesor bele prepara akordu ida, tanba ida ne’e mai ami opozisaun hanesan garantia ida atu imi labele hatama ba gaveta laran. Ami mós hanoin bele avansa ho akordu ida atu nune’e estudante sira mós bele konfia, no ita mós bele konfia malu,”dehan Deputada Nurima.

Xefe Bankada PLP, Deputada Maria Angelina Sarmento hatete, rezolusaun ba kansela sosa kareta realiza ona, maibé tanba saida mak rezolusaun ba lei pensaun vitalisia seidauk bele?. Nune’e, hanoin bankada tolu konkorda ona, bankada Governu mós tenke aseita.

Tanba Nia dehan, ezizensia estudante sira nian ne’e importante tebes.

“Ami konkorda atu halo kedas akordu ida ne’e, atu  ita simplifika diskusaun ne’e,”tenik Deputada Maria Angelina.

Entretantu, dadaun ne’e, asesor sira husi Parlamentu Nasional prepara hela akordo ida ba halakon lei pensaun vitalisia nian, nune’e parte rua bele iha baze legal ida.

Entretantu, ezizensia ne’ebé EUTL ezize ba PN maka halakon lei pensaun mensal vitalisia, altera lei manifestasaun nian, redus osan viajen ba estranjeiru hodi aloka ba iha setór produtivu sira.

Enkuantu, ezizensia seluk maka kona ba hapara sosa tan kareta foun ba deputadu sira, maibé ezizensia ida ne’e deputadu sira responde ona no aprova ona rezolusaun ida ba iha kanselamentu akizasaun viaturas ba deputadu sira iha Parlamentu Nasional.