Xefe Estadu Maiór Jenerál Forsa Armada (XEMJFA), Tenente Jenerál Domingos Raul "Falur Rate Laek" hateten, ohin momentu istoriku ida promove Tenente Mariquita da Cunha, nu’udar feto militár dahuluk ba postu kapitaun iha instituisaun FALINTIL-Forsa Defeza Timor-Leste F-FDTL.

Nia dehan, instituisaun nafatin iha kompromisu ba kultura militár ne'ebé hanesan no inkluzivu, presiza serbisu no kooperasaun barak liután entre atór oioin atu hetan rezultadu substansiál no mudansa signifikativa ba estereotipu no mentalidade ne'ebé hale'u feto iha forsa armada, tanba see Timor-Leste hakarak harii sosiedade ne'ebé forte, metin, hanesan no inkluzivu, ida-ne'e tenke reflete iha aspetu hotu-hotu, inklui forsa armada.

“Ohin mós hanesan loron istóriku tanba ita sei iha feto primeiru ne'ebé hetan promosaun ba postu kapitaun, ne`ebe kumpre hotu kondisaun sira estatutu define,” dehan Jenerál Falur, iha Kuartél Jerá Fatuhada, Sesta (2/2).

Tanba ne’e, tinan oin 2025 sei komemora tinan lima-nulu (50) ezisténsia FALINTIL nian no tinan rua-nulu-resin-hat (24) ezisténsia F-FDTL nian, presiza halo reflesaun kona ba estadu atual Forsa Armada nian.

“Ba ha’u la iha duvida kona ba modernizasaun no profisionalizaaun ba F-FDTL, no labele demora se iha konsensu iha ita nia poder polítiku no alta entidade sira, se ita boot sira konkorda,  ha’u husu ita hotu atu servisu komesa ohin,” afirma nia.

Tanba ne’e iha ambitu selebrasaun tinan 23 ba transformasaun FALINTIL ba F-FDTL,  promove mos membru F-FDTL hamutuk 210, maibé repreznta de’it nain 13 mak halo promosaun husi Tenente ba postu kapitaun ho sarjentu xefi ba postu alferes no sarjentu ajudante ba sarjentu xefi inklui Tenente Mariquita da Cunha Feto militár dahuluk promovidu ba postu kapitaun. 

Iha fatin hanesan, Sekretria Estadu Igualdade Jeneiru, Albina Sousa Carvalho, parabeniza instituisaun F-FDTL promove feto dahuluk ba postu kaiptaun, la’ós buat ida fasil, maibé ne'e liu prosesu ida naruk.

"Ha’u atu hateten de’it dahuluk ha’u hakarak apresiza fé parabens ba feto dahuluk Kapitaun iha instituisaun F-FDTL ne'ebé  bele promove feto ida ne'ebé liuhusi prosesu ida naruk," dehan nia.

Nia dehan, Promosaun postu kapitaun ida ne'e bele sai ezemplu no  mos bele sai inspiradora ba feto maluk sira ne'ebé agora hala’o knaar iha instituisaun F-FDTL ida importante tebes.

"Hanesan oin ita rona komandu F-FDTL nia diskursu hateten momentu istoriku ba instituisaun F-FDTL atu bele haree partisipasaun Feto  iha vida militár, ha’u orguillu tebes promosaun ida ne'e atu hateten mos katak boa sorte ba kapitaun atu bele halo nia servisu, maibé kontinua esforsu aan nafatin sai hanesan inspiradora  ba maluk  feto sira seluk iha instituisaun F-FDTL," informa nia.

Tanba ne'e instituisaun F-FDTL dahuluk promove feto ho postu kapitaun, ida loke dalan ba oin sei iha tan maluk feto lubuk ida hola parte iha instituisaun F-FDTL ne'e rasik, bainhira sira esforsu aan halo tuir regra  boa sorte ba sira sei hetan saida mak justu ba sira.

Profile Kapitaun Marquita

Kapitaun Marquita da Cunha, oan husi Francisco da Cunha no Jacinta Ling Marques, moris loron 5 Maiu 1982, iha Postu Administrativu Same, Munisipiu Manufahi, nu’udar oan ikun husi maun-alin na’in 9, maun na’in 3 no bin 5.

Marquita da Cunha, hahu estudu iha eskola pre-primaria iha SDN 1, Same Manufahi, eskola primaria iha SMP No 2 Same, eskola sekundaria iha SMU Same, Manufahi. Tuir lolos remata eskola Sekundaria iha tinan 1999, maibé tanba referendu no Timor-Leste hili ukun rasik aan, entaun la konsege remata no kontinua fali iha tinan 2000 iha Liceu, Dili.

Depois remata eskola sekundaria, kontinua ba iha universidade, UNTL iha área konstrusaun sivil maibé iha primeiru semester de’it tanba problema familia (aman husik hela mundu/mate) entaun la konsege kontinua, Mariquta deside fila-fali ba iha moris fatin Same, Manufahi hodi ajuda haree maun boot hodi hein kios no iha tempu livre hodi tuir kursu lian ingles.

Depois iha tinan 2002, loke oportunidade ba foin sae feto ho mane ne’ebé hakarak inkorpora ba iha instituisaun F-FDTL no hetan selesionadu Marquita da Cunha, hamutuk ho kolega feto nain 30 ne’ebé hanesan feto iha grupu dahuluk ne’ebé mak tama iha F-FDTL.

Kursu kapasitasaun iha tinan 2002, partisipa kursu lian Ingles basiku iha Sentru Instrusasaun Nicola’o Lobato, Metinaro, iha 2003, partisipa kursu lian Ingles avansadu iha Northern Territory Unversity, Darwin, iha tinan 2004, partisipa kursu Methodolgy of English Language Teaching iha Defence International Training Centre iha Melbourne Australia, iha Maiu 2006, partisipa Seminar regional lingua ingles (CORELS) IV, iha Phnom Penh-Cambodia, iha 2009, partisipa kursu English Teaching Development Course iha Defence International Training Centre, iha 2009. Iha 2016, partisipa seminario feto iha kareira militár iha Jakarta-Indonesia, Kursu UNFMOC (United Nation Female Militár Officer Course), iha Beijing-China iha 201, iha 2023 partisipa seminar PASOLS (Pacific Area Senior Officer Logistic Seminar), iha Wellington-Nova Zelandia no iha tinan 2023, reprezenta foinsae Timor-Leste hodi partisipa iha Shangrila Dialogue iha Singapura.

Nune’e ,oportunidade ba Mariquita kontinua kursu Promosaun iha 2017, tuir kursu promosaun ofisial (CFO) iha Sentru Formasaun Nicola’o Lobato, Metinaro,  partisipa kursu Promosaun ba kapitaun hosi fulan Jun – Dez 2023 iha sentru formasaun Komandante Nicola’o Lobato(CICNL), Metinaro.

Funsaun ne’ebé asumi no kolokasaun, hahu 2005-2010 sai hanesan formador lian Ingles basiku (Centro de Instrução Nicola’o Lobato, Metinaro), tinan 2010-2012 sevisu iha Gabinete do Chefe Estado Maior (Quartel General das F-FDTL), iha 2013-2015 servisu iha Gabinete do Vice Chefe Estado Maior General das F-FDTL (Quartel General das F-FDTL), Tinan 2016, hanesan interpreter ba treinametu formasaun forsa espesial, Tinan 2016-2019, servisu iha seksaun protokolu (iha Quartel General das F-FDTL), Tinan 2018-2019 Jullu, tama iha equipa recolha no hakerek istoria sobre vivencia ba militár ativu sira no kontinua hanesan Chefia Secçao Logistica iha Unidade Falintil no iha tinan 2020, hahu asumi funsaun hanesan Chefe Secção Igualdade Género iha Quarte General das F-FDTL até agora.

Marquita da Cunha, hahu hetan Promosaun,  Promove ba posto Furriel iha tinan 2007,  Promove ba posto  segundu Sargento iha tinan 2009,  Promove ba posto Tenente iha tinan 2017,  Promove ba Kapitaun dia 2 Feb 2024.

Hasai lidensiatura iha area Relasõens Internasional iha Universidade da Paz iha tinan 2016, kapitaun Marquita da Cunha kaben nain, laen naran José Pinto (profisaun F-FDTL, posto Major), sira iha oan nain 5, mane 4, feto ida  ho naran Charles X. Cunha Pinto tinan 18,  Auxiliandro X. Cunha Pinto tinan 13, Nenia X. Cunha Pinto (Falecida), Iolando X. Cunha Pinto tinan 4 no  Jomar X. Cunha Pinto halo semana 3.

Hanesan feto, senti orgullu bele hetan fiar husi instituisaun F – FDTL ba promosaun ida ne’e, ne’e sai mos hanesan desafiu no responsabilidae bo’ot oinsa hala’o ha’u nia kna’ar lo- loron nu’udar Kapitaun ida.