Tuir Ministru Agrikultor no Peskas, Pedro dos Reis hatete, Ministeriu servisu hamutuk ho Diresaun Nasional karentena sei halo aprosimasaun ho agrikultor sira ho floresta atu kuda sira nia produtu, atu kompaña lokal sira sosa hodi exporta ba rai liur.
“Ami sei halo esforsu oinsa atu emprezariu sira ne’ebé atu exporta sasan bele mantein ho kualidade,”dehan nia iha serimonia lansamentu, iha Kolmera, tersa ohin (15/06).
Nia hatutan, produtu lokal ne’ebé atu halo exportasaun mak hanesan, kamí, maek, talas, cengkeh, kafe no nuu.
Ministru Pedro akresenta, ba oin sei halo investimentu ne’ebé diak atu promove diak liu produtu lokal sira ne’e.
Prezidente CCITL Oscar Lima, hato’o nia agradese ba kompaña lokal sira ne’ebé iha vontade hodi hala’o nafatin atividade ekonomika.
“Husu ba emprezariu sira atu nafatin mantein aten brani hodi hala’o atividade iha situasaun serka sanitaria no estadu emerjensia,”nia dehan.
Nia mós, husu atu emprezariu sira kria kondisaun ne’ebé diak ba iha produtu atu nune’e exporta na’in sira bele iha konfiansa.
Entretantu, na’in ba kompaña Same Diak Contruction/Supplay no Kafe Timor-Lorosa’e, Tji Vu Sing hatete, iha tinan uluk to’o agora iha produtu lokal hamutuk toneladas 600 mak sira sosa ona.
“Nune’e, iha tinan ida ne’e ami sosa produtu lokal hanesan kafe, maek no kamí hamutuk toneladas 200 atu exporta ba iha ba iha nasaun Thailandia, Indonesia no Xina, maibé iha situasaun Covid-19, nasaun Xina seidauk bele halo exportasaun,”dehan nia.
Nia hatutan, produtu lokal maek ne’e sei halo produsaun ba kosmetik, biskuat Gerry, goma, mie korea no mós buat barak tan.
Asistente Editor: Saturnina da Costa
