Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, sidadaun hanesan ema Timor-oan hela iha Munisipiu Maliana no hetan moras hanesan mear, iss bo’ot, nune’e susar atu dada is, durante semana ida nia laran.
Hafoin, lori ba Óspital Referensia Maliana halo tratamentu, no iha loron 13 fulan-Juñu ekipa saúde enkamiña husi HRM ho aviaun ambulánsia.
“Matebian hetan dignoze traballu sindroma insufisiénsia respiratória aguda (SIRA), ka susar/difisil atu dada-iis, tamba Covid-19 (rezultadu PCR pozitivu ho CT–cycle treshold – 21,5), no laiha istória moras seluk, maibé mear ho iis-boot iha uma durante semana ida nia laran ona,”dehan nia segunda ohin.
Enkuantu, iha fatin isolamentu Vera Cruz ekipa médiku sira halo re-avaliasaun ba dignóstiku no to’o iha konkluzaun katak matebian iha ona septic shock tanba pneumonia ne’ebé provoka husi Covid-19.
Rui relata, matebian hetan tratamenu tuir protokolu ne’ebé iha, inklui tratamentu ho oksijéniu, maibé ohin dader tuku 11h40 iis-kotu tanba respiratoric failure no multiple organ failure.
Familia kordena hela ho ekipa saúde atu hala’o funeral tuir protokolu ne’ebé adopta iha Timor-Leste.
Entretantu, tuir dadus ema ne’ebé mate ho Covid-19 hamutuk na’in 19 kompostu husi, mane na’in 13 no feto na’in 6.
Asistente Editor: Saturnina da Costa
