Tuir Vise Ministru Administrasaun Estatal, Lino de Jesus Torrezão hatete, nudar meius ida atu responde ba situasaun Covid-19 ho inundasaun ne’ebé komunidade kbiit laek sira infrenta, nune’e MAE ho MSSI iha planu konjunta ida hodi distribui fós.
“Tanba ne’e, ohin ami mai hamutuk ho instituisaun sira atu atende lalais ba postu inundasaun ne’ebé ita nia komunidade sira infrenta, tanba sira barak menus aihan no ekonomia lasufisiente,”dehan nia iha serimonia intrega fós ba komunidade sira iha Aldeia 05 Fatuhada, tersa ohin (15/06).
Vise Ministru hatutan, MAE ho MSSI sei mobiliza fós saka 26,875 ba Munisipiu hotu iha teritoriu laran tomak.
Nune’e, iha Dili sei distribui fós saka 10,375 ba aldeia sira hotu, no Munispiu seluk ho total hamutuk 16,500, ne’ebé sei jere husi Prezidente Autoridade no Administrador Munisipiu sira.
Entretantu, Xefe Aldeia 05 Egidiu Freitas Ximenes hatete, fós ne’ebé distribui la sufisiente tanba komunidade kbiit laek iha Aldeia 05 maioria.
“Dadus kbiit laek ne’ebé ha’u foti horseik hamutuk 32 no ohin simu tan 34, maibé ida ne’e seidauk rekolla hotu,”dehan nia.
Tanba ne’e, nia husu ba parte relavante atu bele responde hotu komunidade nia prekupasaun ne’ebé sira infrenta.
Asistente Editor: Saturnina da Costa
