Diretór Jerál Obras Públiku Rui Hernâni Freitas Guterres fó sai asuntu ne’e, iha knaar fatin Bebora, Dili  Kuarta (14/03).

“Manutensaun ne’e para iha fulan Outubru 2016, tanba atraza iha pagamentu,” dehan Rui.

Nia mós esplika kona ba prosesu pagamentu, presiza  re-alokasaun orsamentu ne’ebé tenke hetan mós vistu husi Tribunál das Kontas foin bele halo pagamentu ba kompañia sira.

Kompañia rua ne'ebé responsabiliza manutensaun tenke para iha dalan klaran, ka  tenke suspende sira nia atividade manutensaun tanba la iha pagamentu.

Diretór ne’e informa, kona ba prosesu re alokasaun bele halo tanba osan iha, maibé atu legaliza presiza iha autorizasaun ka vistu husi Tribunál das Kontas.

Maski nune’e, VII governu liu husi Konsellu Ministru deside ona hodi orienta ekipa tékniku ne'ebé oras ne’e prepara hela dadus atu haruka ba Tribunál das Kontas hodi halo vistu, atu autoriza prosesu pagamentu, nune’e manutensaun bele kontinua hikas iha tempu badak.

Entretantu, kompañia ne’ebé kaer obra manutensaun estrada diresaun Tibar ba Likisá mak hanesan Kompañia São José no diresaun Tibar Gleno mak hanesan kompañia PP Indonézia.