Movimentu Universitáriu Timor-Leste (MUTL) planeia ona sei halo manifestasaun boot hasoru Parlamentu Nasionál to’o hetan solusaun ba karreta Prado no mós planu sosa karreta foun ho trasaun.
Koordenadór Kampu MUTL, Diamantino da Costa hatete, Segunda (19/11), sei kontinua halo manifestasaun boot hasoru PN.
Nia hatutan, manifestasaun ne’e haruka ona karta ba veteranu, sosiedade sivíl, Igreja, CPD-RDTL no autoridade lokál Munisípiu Dili hodi partisipa iha manifestasaun ne’e.
Ezijénsia ne’ebé MUTL halo ho forsa boot ne’e, sei nafatin hela. Husu atu hapara sosa karreta foun ba deputadu sira no dada hikas karreta Prado husi eis-deputadu sira nia liman.
“Manifestasaun tenke hetan solusaun, se la hetan ami kontinua halo manifestasaun dehan Diamantino iha Kampus Liseu-UNTL, horisehik.
Ba asaun ne’e, MUTL mós aprezenta ona karta koñesimentu ba PNTL hodi bele kontinua asegura hodi labele mosu problema hanesan iha asaun primeiru.
Iha fatin hanesan, Sesaun Mobilizasaun Massa MUTL, Fernando Ximenes hatete, asaun sei kontinua maski membru MUTL 22 hetan kaptura no na’in tolu kanek, maibé ho prinsípiu to’o hetan solusaun ba karreta ne’e.
