“Aliansa Universitáriu Timor-Leste (AUTL) deklara, infelizmente durante implementasaun aula online laiha efekásia no piór liu efisiente, ne’e laiha no ami husu atu MESSK reativa fali eskola sira hodi mantein aula prezesial,”dehan portavoz AUTL Francisca da Silva iha kampus FEAH-Liceu, Dili (28/04).
Nia esklarese, razaun lima ne’ebé hatudu implementasaun aula online laiha efikasia mak hanesan, estudane balun laiha telefone android hodi asesu aula virtual ka online, estudante balun mézmu iha telefone androind maibé laiha osan atu sosa pulsa hodi asesu aula virtual.
Estudante sira ne’ebé iha telefone android no iha osan atu sosa pulsa, maibé rede internet la apoiu estudante sira atu asesu aula virtual.
Nune’e mós estudante foun balun seidauk hala’o sira-nia aula virtuál, tanba iha difikuldade boo’t ba dosente atu rekolla sira-nia konta online, liuliu estudante balun susar uza aplikasaun online.
Husi situasaun sira ne’e hotu Governu liu husi Ministru Ensinu Superiór, Siénsia no Kultura (MESSK), Longuinhos dos Santos, atu fó apoiu rede internet ba estudante universitáriu mós problema sei la rezolve, tanba laos solusaun mak ida ne’e.
Aliende, liga ba reativasaun atividade ekonomika sosial hanesan, transporte públika, merkadu, atividade relijioza no sira seluk, Aliánsa Universitáriu Timor-Leste (AUTL) ezize ba governu labele extende tan serka sanitaria maibé mantein deit ho estadu emerjensia, importante hatur medida rigor iha implementasaun no rapida iha kontrolu.
Husu ba MESSK, atu reativa aula prezensiál, importante nafatin koopera ho Reitór-sira hotu atu bele kria mekanismu ne’ebé apropriadu ho situasaun ohin loron.
Entretantu, husu ba estrutura kada instituisaun privada no públika atu reativa “equipa de controlo” medida prevensaun nian hanesan fulan rua liu ba, atu nune’e bele garante laiha propagasaun ba virus aat ne’e.
Nune’e deklarasaun AUTL ezize nafatin ba MESSK hodi labele extende tan serka sanitaria maibé mantein ho estadu emerjensia.
Bazeia ba dekretu lei, Prezidente Repúblika fó kbiit ba Governu atu kontinua extende suspensaun ba atividade prezensiál sira inklui atividade eskolár iha munisípiu ne’ebé espansionadu ona ho Covid-19.
Haree ba situasaun epidemiolójika iha Timor-Leste, Prezidente Repúblika (PR) dekreta estadu emerjensia ba dala-12 iha oras 00:00 loron 31 fulan-marsu tinan 2021 no termina iha oras 23:59 loron 2 fulan-Maiu tinan 2021.
Nune’e Governu kontinua aplika serka Sanitaria nu’udar medida prevensaun, hodi hapara prosesu aprendijazen prezensiál ba eskola sira hotu.
Governu mós propoin ona ba Presidente Repúblika, atu extende tan estadu emerjensia ba dala-13, tanba situasaun atual Covid-19 hahú daet ona ba transmisaun komunitaria
Entretantu Presidente Repúblika hato’o ona pedidu ba Parlamentu Nasionál hodi autoriza deklarasaun estadu emerjensia ba dala-13 ne’e, hafoin estadu emerjensia ba dala-12 termina iha loron 2 fulan-Maiu 2021.
Tuir dadus kazu Covid-19, tersa (27/4, kazu foun na’in 99, kazu rekuperadu na’in 76 no kazu ativu ne’ebé iha izolamentu hamutuk na’in 1073.
Jornalist:Novencio do carmo Vieira
Editor:Jose Sarito Amaral
