Tuir fonte kredivel sira husi Palacio Governu no Palasio Presidénsial informa ba Online Independente katak, Governu aprejenta kandidatu úniku mak adjuntu Prokuradór Jerál Repúblika Dr. Afonso Lopez hodi troka Prokuradór Jerál Repúblika, ne’ebé kuarta ohin (28/4) termina ona nia mandatu.
Dr. Afonso Lopez, nomeadu ba adjuntu PJR husi Presidente Repúblika iha 4 fulan-Setembru tinan 2018, tuir dekretu Presidente Repúblika nú. 34/2018, 5 de Setembru.
Ho esperénsia ida ne’e, Governu tau konfiansa hodi troka Prokuradór Jerál Repúblika José Ximenes, ne’ebé termina ona nia mandatu kuarta ohin no tersa horsehik (27/4) nia mós halo ona despedida ho Presidente Repúblika Fransisco Guterres Lú Olo.
Tuir Konstituisaun RDTL, artigu 86, Alinea L konjugada ho nú. 6, artigu 133 kona-ba assuntu nomeasaun, katak demite no ezonera Prokuradór Jerál Repúblika sai hanesan kompeténsia eklusiva Presidente Repúblika.
Entretantu Prokuradór Jerál Repúblika Dr. José Ximenes nomeadu husi Presidente Repúblika ba periodu dahuluk iha 28 Abril 2017. Nia hetan fali konfiansa ba periodu daruak husi tinan 2017-2021.
Tuir estatutu Prokuradoria Jerál Repúblika, ba PJR ne’ebé hetan ona mandatu periodu rua tutuir malu sei la extende tan ba periodu datoluk.
Tuir planu, Presidente Repúblika sei fó posse ba PJR foun iha semana ida ne’e nia laran.
PJR sei sai guardiaun ba ordem jurídika no defeza ba direitu sosiais hodi halo tuir deit mak lei no Konstituisaun, no mós tane ás intereses povu no estado Timor-Leste.
Jornalista:Novencio do Carmo Vieira
Editor:Jose Sarito Amaral
