Vise-Ministru Administrasaun Estatal, Lino de Jesus Torrezão, hatete, MAE selebra akordu ida ho BNCTL hodi konkretiza servisu desentralizasaun administrativa ne'ebé atribui kompetensia sira iha administrasaun sentral MAE nian, sei delega hotu ba iha munisípiu sira.

“Objetivu husi asina akordu ida ne'e BNCTL atu halo transferensia publika ho orsamentu ba programa merenda eskolar nian hamutuk  dolar amerikanu Millãun $15 ba munisipiu sira hotu,”dehan komunikadu ne’ebé Online INDEPENDENTE sita kuarta (22/02).

Ba akordu ne’e, Governante dehan, MAE fó fiar ba BNCTL hodi jere orsamentu ne'e ho di'ak no bele intrega ba iha munisípiu hotu iha teritóriu TL hodi bele implementa programa merenda eskolar.

Entretantu, Prezidente Konsellu Administrasaun BNCTL António Fransisco Vitor, hatete, BNCTL senti orgullu tanba dala ida tan Governu bele fó fiar ba BNCTL hodi kontribui ba dezenvolvimentu nasional hodi halo investimentu ba labarik sira nia futuru.

“Liu husi akordu ba projetu merenda eskolar ne'ebé sei implementa iha teritoriu Timor-Leste tomak ho ninia regra sira ne'ebé estebelese iha BNCTL hodi bele implementa programa sira ne'ebé mai husi  Estadu,”hakotu nia.