Programa BdM-JF etapa daruak sei realiza iha Munisipiu Vikeke, Manatutu, Líkisa no Kovalima.
“Objetivu husi programa BdM-JF mak, atu hamenus ki'ak, hadi’ak saúde no nutrisaun inklui redus raes badak, hodi enkoraza inan sira atu labele falta ba iha klínika sira hodi konsulta, no atu haburas ekonomia família nian ba hotu-hotu,”dehan komunikadu ne’ebé Online INDEPENDENTE sita, kinta ne’e (23/02).
Tuir komunikadu, iha programa BdM-JF ne’e, inan isin-rua sei simu $15 kada fulan, labarik husi tina 0 to’o 6 sei simu $20, sumplementu $10 ba labarik moris ho kondisaun defisiénsia.
Tan ne’e, husu ba benefisiáriu programa BdM-JF husi Munisípiu hitu, atu kontinua hakbesik an ba iha postu saúde no sentru saúde sira iha suku, postu administrativus no munisípiu hodi rejista iha ofisiál rejistu BdM-JF iha postu no sentru saúde sira, hodi hetan direitu ba programa ida ne’e.
Nune'e mós, lansamentu ba etapa daruak ne’e kompleta liutan lansamentu dahuluk ba Munisípiu Ainaro, Bobonaro no RAEOA, iha loron 22 fulan Jullu 2022 husi Primeiru Ministru, Taur Matan Ruak.
Nomeadamente lansamentu ba daruak ne’e atu kompleta kompromisiu Governu nian iha jornada ekspansaun programa BdM-JF ba Munisípiu haat kada tinan.
Finalmente iha tinan ida ne’e, MSSI ekspanda ona BdM-JF ba Munisípiu haat hodi kompleta Munisípiu tolu iha primeiru lansamentu.
Tanba ne’e, programa ida ne’e kobre ona Munisípiu hitu mak hanesan Ainaro, Bobonaro, RAEOA, Likisá, Kovalima, Manatutu no Vikeke.
Entretantu Munisípiu neen seluk hanesan: Aileu, Ermera, Manufahi, Baucau, Dili, no Atauro sei kompleta ba faze tuir mai.
Enkuantu, antes ne'e Ofisiais rejistu programa Bolsa da Mae-Jerasaun Foun (BdM-JF) hamutuk ema nain 135 husi Munisípiu Vikeke, Manatuto, Líkisa no Kovalima, hahú selebra kontratu servisu ho MSSI hodi presta servisu atendimentu rejistu ba benefisiáriu programa BdM-JF iha Munisípiu haat.
Diretór Jerál Solidariedade Sosiál no Inkluzaun, Florencio Pina Dias Gonzaga hateten, ofisiál rejistu sira nu’udar komponente ida ne’ebé sei kontribui ba objetivu Estadu nian liuhusi redus kiak, redus malnutrisaun, raes badak no mós haburas ekonómia família iha munisípiu destakadu.
