“Períodu eleitorál iha hahú janeiru tinan oin to’o realizasaun eleisaun Prezidente Repúblika, kazu hakat ba segunda volta, STAE preparadu atu halo eleisaun. Medidas ne’ebé STAE halo ona no sei halo hodi prepara eleitores sira atu tuir votasaun no iha hotu ona,”Ministru Administrasaun Estatál esplika preparativu sira ne’e, ba Presidente Repúblika, Fransisco Guterres Lú Olo, kuarta (12/5), iha rezidensia PR, Farol Dili.
Ministru argumenta katak, to’o marsu 2021, STAE rejista ona eleitor sira hamutuk 839.430, maioria iha railaran no iha tasibalun hamutuk 6010.
Maski nune’e, tuir planu husi fulan jullu 2021-janeiru 2022, STAE sei hala’o resensiamentu no atualizasaun baze dadus eletoral no molok eleisaun tenke pubilka lista eletór sira iha sentru votasaun.
Aliende ne’e, Ministru Miguel mós informa ba Prezidente Repúblika kona-ba alterasaun Lei Eleitoral Prezidente Repúblika ba dala-neen.
“Alterasaun ba dala-neen Lei Eleitorál Prezidensiál atu permite populsaun sira, liuliu sira ne’ebé hela iha Díli, envez fila fali ba sira nia hela fatin, bele vota iha Díli, maibé tenke avizu antes ba STAE pelumenus loron-40, atu STAE bele publika lista dos eleitores iha sentru votasaun sira iha Timor laran tomak, inklui sira ne’eebé sei partisipa iha sentru votasoins paralelu sira.”
Entretantu Presidente Repúblika Fransisco Guterres Lú Olo, hetan posse iha loron 20 fulan-Maiu tinan 2017, no sei remata iha loron 20 fulan-Maiu tinan 2022.
Lú Olo hetan votus maioria iha eleisaun presidensiál ba periodu tinan 2017-2022, ho total pursentu 51,7.
Asistente Editor: Saturnina da Costa
