Tuir komunikadu ne’ebé online INDEPENDENTE asesu katak Reuniaun ne’e, Governante na’in-rua hetan akompañamentu hosi Xefe Gabinete MACLN, Nilton Ximenes da Neves, Xefe Gabinéte SEV, Abríl Borges, Asesór Tékniku, Asesór Jurídiku, Alcino Soares Gomes, Jacinto Vicente Viegas “Roke”, hanesan Asesór Polítiku.
Iha reuniaun ne’e, Asuntu krusial ne’ebé sai fokus durante reuniaun ne’e mak diskute kona-bá planu no preparasaun hotu no mekanízmu sira ne’ebé atu implementa durante seremónia prestasaun ónras fúnebres tuir mai.
Entretantu, reuniaun alargada ne’ebé realiza iha Sala Gabinéte MACLN iha Comoro-Dili ne’e, hetan partisipasaun másima hosi diresaun kargu no xefia sira mak hanesan, Diretór jerál bá Asuntu Kombatentes Libertasaun Nasionál, Joaquim Carvalho de Araújo “Laletek”, Diretór jerál Administrasaun no Finansas, Osório Bianco Ximenes de Araújo, Diretór Nasional bá Jestaun Patrimóniu, Istória no Programas (DNGPHP), João Manuel Tavares da Silva.
Diretóra bá Planu, Finansas no Lojístika, Rosa da Costa Gomes, Diretór Rekursu-Umanu nian, Celio Sarmento, Diretór Aprovizionamentu, Amâncio Marques, , Xefe Departamentu Programas, Agapito de Araújo, Xefe Relasaun Públika, Angelito Duarte da Silva, Asesóres Tékniku, Diógo Fraga Neto ho Nuno Gabriel Carvalho De Sá, inklui Enjiñeiru José Cornelio Amaral ho tékniku balu tán.
Enkuantu, remata tiha enkontru ho diresaun kargu no xefia sira, Exelénsia Ministru “Oan Soru”, aranka kedas bá Jardím dos Heróis e Mártires da Pátria Fatuquero, Postu Railaco, Ermera, hodi observa fila-fali progresu sira hosi konstrusaun hotu ne’ebé dadauk ne’e empréza-kontratór halo iha terrenu.
Ministru “Oan Soru” observa Jardím dos Heróis no Mártires
Purtantu, Ministru Asuntu Kombatentes Libertasaun Nasionál (MACLN), Gil da Costa Monteiro “Oan Soru”, akompañadu hosi Enjiñeiru José Cornelio Amaral, iha Segunda-feira, tuku-tolu lorokraik ne’e, halo vizita bá Jardím dos Heróis e Mártires da Pátria iha Suku Fatuquero, Postu Administrativu Railaco, Munisipiu Ermera.
Vizita ne’e, hafoin remata enkontru alargada ho diresaun kargu no Xefia sira iha gabinéte MACLN, Komoro-Dili, Segunda (15/06/2026).
Objetivu hosi vizita ne’e, tanba Exelénsia Ministru “Oan Soru” hakarak haree observa direta progresu sira hosi servisu ne’ebé empréza-kontratór ninia traballadór sira hala’o hela iha konstrusaun bá kampra rihun-ida, atus-neen (1,600), pavimentu ho walkways iha Ermera.
Estadu Timor-Leste liuhosi IX Governu Konstitusionál komprometidu atu kontinua dignifika no garante objetivus konstitusionál sira relasiona bá Rekoñesimentu no Valorizasaun bá kontribuisaun Kombatentes Libertasaun Nasionál sira ne’ebé mate ka lakon iha luta bá Independénsia Nasionál liuhosi Ceremônia de Prestação Honras Fúnebres de Estado dos Restos Mortais, konforme Konstituisaun RDTL, Artigu 11, no Estatutu Kombatentes Libertasaun Nasionál nian, Lei Númeru 3/2006, loron 12 Abríl no primeira-Alterasaun bá Lei Númeru 9/2009, loron 29 Jullu, Segunda-Alterasaun bá Lei Númeru 2/2011, loron 23 Marsu, no terseira-Alterasaun bá Lei Númeru 3/2024, loron 12 Juñu haruka.
Iha tinan 2026, MACLN pretende atu implementa desizaun polítika Nonu-Governu Konstitusionál nian atu haloot tán restos-mortais hamutuk rihun-lima resin iha Ermera.
Relembra fali katak, iha tinan kotuk 2025, MACLN realiza tiha ona “Ceremônia de Prestação Honras Fúnebres de Estado dos Restos Mortais”, iha ne’ebé, hakoi ona restos-mortais iha munisípiu tolu (3) mak hanesan, Munisipiu Lautem 56, Munisipiu Manatuto 105, no Munisipiu Likisá hamutuk 50.
