Kandidatu Lu-Olo atuál Presidente partido FRETILIN ne’e manan votus maioria iha Munisipiu 9, entretantu kandidatu Kalohan atuál Sekretariu Jerál Partido Demokratiku (PD) hetan votus barak iha Munisipiu rua (4) inklui rejiaun Autonomu Oequsse.

Lu-Olo ne’ebé hetan apoiu makaas mós husi partido boot CNRT lidera husi Kay Rala Xanana Gusmão, PEP, ASDT no partido UNDERTIM, hetan votus barak iha Munsipiu Lautem hamutuk rihun 11.930, Baukau hetan rihun 41.943 votus, Manatutu rihun 7551 votus, Viqueque rihun 27.424, Aileu hetan rihun 11.656, Dili hetan rihun 51.698, Ermera rihun 3.120, Covalima rihun 7.245, Manufahi rihun 14.372.

Entretantu kandidatu Kalohan ne’ebé hetan apoiu votus husi Partido Libertasaun Povu (PLP), KHUNTO, manan votus barak iha Rejiaun Autonomu Oequsse rihun 14.148, Ainaro rihun 12.925, Bobonaro rihun 3.684 no Likisa rihun 5.934.

Aliende ne’e, votus Lu-Olo iha sentru votasaun Sidney hetan votus 43, Kalohan hetan 14. Entretantu iha Darwin, Lu-Olo votus 79, kalohan 57. Sentru votasaun iha Lisboa (Portugal, Lu-Olo hetan votus 187, Kalohan hetan votus 62.

Rejultadu provisoriu atuál husi STAE iha tuku 1:05 ba loron tersa (21/3), hatudu Lu-Olo sei hetan númeru dahuluk ho votus maioria hamutuk 269.337 (57,37%), Kalohan hetan votus 151.881 (32.35%).