Lú Olo Lakohi Governu Falla Featured

By Lígia Noronha Outubru 04, 2017 1600
Lu Olo Lu Olo

DILI: Prezidente Repúblika, Francisco Guterres Lú-Olo, tau konfiansa tomak ba estrutura VII Governu Konstitusionál iha ukun tinan lima.

Xefe Estadu lakohi Governu atu falla, tanba ne’e tenke hatudu rezultadu ba progresu dezenvolvimentu ne’ebé sei hetan susesu iha tinan lima nia laran 2017-2022.

Atu lori nasaun ne’e hetan susesu, Prezidente Repúblika apela ba membru VII Governu tomak atu hala’o servisu labele ko’alia mak barak, maibé tenke hatudu servisu hodi fó susesu ba governasaun.

“Iha 2022, ita tenke entrega ba ita nia susesór sira, país ida ne’ebé di’ak liu duke iha ohin loron. Ida ne’e ita nia responsabilidade, ita nia devér,” dehan Lú-Olo, iha ninia diskursu serimónia pose ba membru Governu, iha Palásiu Prezidente-Dili, horisehik.

Nia hatutan, povu Timor-Leste ohin loron hein no hakarak Governu halo programa no implementa progresu dezenvolvimentu ne’ebé hatudu progresu hodi loron nasaun ne’e sai husi ki’ak.

“Ita hotu servisu daudaun ba. ko’alia uitoan, halo mak barak! Labele husik ba aban, Buat ne’ebé ita bele halo ohin”, tenik nia.

Nia dehan, membru governu hotu-hotu atu hatudu dedikasaun no servisu ho transparénsia ba sidadaun sira bainhira implementa planu prioridade nasionál.

Governu trasa ona Planu Estratéjiku Dezenvolvimentu Nasionál (PEDN) 2011-2030 aprova ona hodi ezekuta tuir etapa hodi dezenvolve ho ekilibradu iha kada munisípiu no rejiaun sira.

“Dalan di'ak liu mak atu implementa Planu Estratéjiku Dezenvolvimentu Nasionál hodi foti desizaun di'ak ba ita nia rain”, nia espera.

Nia dehan, governu ne’e tenke tau planu prioridade nasionál iha ajénsia governu nu’udar planu urjente atu ezekuta.

Xefe Estadu dehan, planu prioridade ne’ebé povu presiza maka hadi'a kualidade servisu iha área saúde, edukasaun, hadi'a dezempeñu, hamenus ki’ak, kria empregu ba joven, diversifika ekonomia, hadi'a infraestrutura no halo governu transparente iha programa.

Atu lori programa ne’ebé temi hodi hetan susesu, Xefe Estadu Lú-Olo dehan, Governu ka partidu opozisaun hotu-hotu tenke hatudu maturidade, pasiénsia, kontrola-aan no sentidu Estadu.

“Ita nia país presiza ida ne’e, povu Timor-Leste hein ida ne’e,” nia apela.

Dezenvolve Rikusoin TL

Entretantu, Prezidente timoroan husu atu governu presiza servisu makaas hodi dezenvolve rekursu no rikusoin TL nian ho di'ak hodi hatama osan ba kofre Estadu.

Nia dehan, bainhira Governu dezenvolve rekursu Timor nian sei bele hadi'a povu nia moris atu kore aan hosi kiak no mukit.

“La’ós ho polítika tun-sa’e maka ita bele hadi'a povu nia moris, ita hadi'a ho servisu ho hotu-hotu ninia partisipasaun no dedikasaun”, dehan Lú-Olo.

Tuir nia, agora daudauk povu ninia hakarak maka governu halo buat di'ak ba povu nia moris maka importante liu.

Governu ne’ebé lidera husi PM Mari Alkatiri harii ho sakrifísiu boot no vontade tomak halo diálogu ho pasiénsia too forma governu atu lori ema hotu-hotu partisipa iha dezenvolvimentu sosiál, ekonomia no polítika.

Nia hatuan, Governu ne’e mós sei kontinua hakbesik ba lider partidu polítiku hotu-hotu ho parseiru dezenvolvimentu sira atu kontribui ba dezenvolvimentu TL.

PR husu atu membru governu hotu-hotu atu hatudu sira nia kapasidade profisionál atu halo programa Governu nian tomak hodi rezultadu ba povu no nasaun.

Lú-Olo dehan, Governu ne’e harii la’ós atu fahe de'it kadeira entre partidu polítiku, maibé atu mai servisu haree ba interese nasionál povu no Estadu nian.

“Governu la’ós harii no labele harii atu fahe de’it kadeira… Presiza halo duni buat ida ba rai ne’e la’o ba oin”, nia apela.

Nia hatutan, bainhira ema hotu-hotu hasae kualidade servisu maka sei bele fó kualidade di'ak ba Estadu no sidadaun.

Xefe Estadu hein, knaar ba pozisaun membru governu balun ne’ebé sei mamuk iha tempu besik primeiru ministru sei buka ema ne’ebé matenek no intelektuál atu prienxe fatin sira ne’e.

 

Rate this item
(0 votes)

Independente Digital TV