Kestaun ida ne’e hato’o husi Primeiru Ministru Taur Matan Ruak hafoin hasoru-malu ho Prezidente Repúblika iha Palasiu Prezidensial, Bairru-pite, Kinta (19/07).

PM Taur dehan, nia ho Aliansa Mudansa ba Progressu (AMP) ne’ebé sustenta Governu Konstituisionál Daualu sei haree opsaun ne’ebé Prezidente Repúblika prefere ba lista membru governu ne’ebé seidauk simu pose.

“Prezidente Repúblika husu ami atu formalmente aprezenta fila fali ami-nia opsaun ba Prezidente Repúblika, tanba ne’e sira sei lori ne’e, mensajen, ba AMP atu lori fali proposta ka opsaun ba Prezidente Repúblika,” informa PM Taur ba jornalista sira.

Ba kestaun mantein kandidatu hirak ne’ebé molok ne’e aprezenta, Xefe governu ne’e husu atu hothotu hein.

“Hotu-hotu hein saida mak sei akontese tanba desizaun ikus ka palavra ikus sempre iha Prezidente Repúblika nia liman,” deklara nia.

Entretantu, Diretor Ezekutivu Programa Monitorizaun Sistema Jusdisial (JSMP) Luis Oliveira de Sampaio hatete, tenke troka kandidatu membru governu iha lista ne’ebé molok ne’e Prezidente Repúblika suspende ona.

Tuir Diretór JSMP, nu’udar xefe estadu, Prezidente Repúblika iha kompetensia atu reklama katak ema sira ne’e hetan suspensaun.

“Ha’u hanoin segredu justisa ne’e ligasaun seguransa nasionál ne’ebé ameansa ba seguransa estadu. Purezemplu, kazu abuzu seksual ba minoridade, ida ne’e segredu justisa, maibé kona-ba kazu ida ne’e, kazu politiku, ema figura politiku, tanba ne’e mak tenke iha solusaun,” deklara nia.

Hafoin liu husi diskusaun balun PM Taur deside hodi hasai kandidatu na’in rua (2) husi na’in 11 husi lista. Naran ne’ebé hasai mak Gastão Sousa ne’ebé atu asume kargu Ministru Planeamentu no Investimentu Estratéjiku (MPIE) no Marcos da Cruz ho pasta Vise-Ministru Agrikultura no Peska.

Atualmente, pozisaun Gastão nian sei responsabiliza husi Xanana Gusmão no Marcos nian troka husi Rogério de Araújo Mendonça.