“Ami lori programa iha semana ne’e, karik tarde liu mak iha loron Kinta data 19 Jullu mai PN atu deskuti,” informa Fidelis ba jornalista sira iha PN, Segunda (16/07).

Fidelis fiar katak programa governu sei pasa iha PN tanba hetan apoiu husi deputadu AMP ho kadeira 34.

Kona-ba lista ba membru governu sira, Fidelis informa, Primeru Ministru Taur Matan Ruak kontinua mantein lista ne’ebé Prezidente Republika Francisco Guterres Lú Olo pendente.

Nia dehan, governu presija estutura ne’ebé kompleta hodi haforsa estutura VIII Governu, tanba kandidatu balun seidauk simu posse bele hamosu faillansu iha Governu ne’e.

Entretantu, Asosiasaun HAK konsidera VIII governu sei kontinua hasoru difikuldade tanba ministeriu barak mak seidauk iha ministru. Tan ne’e Programa no orsamentu ne’ebe Primeiru Ministru sei ba aprezenta iha Parlamentu Nasional seidauk serteza.

Diretór Ezekutivu HAK, Manuel Monteiro hatete, normalmente governu hothotu bainhira atu halo aprezentasaun programa orsamentu ba PN, ministeriu hothotu tenke halo aprezentasaun.

“Ami seidauk hatene serteza kona-ba aprezentasaun programa ne’ebé Primeiru Ministru VIII governu atu ba aprezenta ne’e akumula ministériu hotu ninian ka ministériu balun de’it. Tanba ministériu balun seidauk iha ne’ebé ami seidauk hatene serteza loloos kona-ba aprezentasaun programa ne’e ba Parlmantu Nasionál,” dehan Manuel.

Tuir Manuel, importante tebes atu governu asegura katak ukun ida ne’e la’o tuir vontade povu ninia no la’o tuir konstituisaun repúblika nia hakarak.

“Ha’u hanoin polítiku-nain sira hatene sira halo tuir lei ka la’e, tanba ami rasik la haree sira-nia orsamentu. Sa tan ho sira-nia programa, ami la haree, tanba sira la fó sai ba públika atu akompaña sira-nia programa no planu orsamentu,” dehan nia.

Entretantu Diretór AJAR José Luis de Olveira hatete, iha konstituisaun hakerek bainhira governu ne’ebé foun eleitu tenke ba aprejenta nia programa iha Parlamentu Nasionál.

Programa ne’e, nia hatutan, tenke pasa, se la pasa governu bele monu. Kuandu ida ne’e mak akontese Timor Leste bele hakat fali ba eleisaun antesipada.

“Ha’u hanoin buat ida ne’e la di’ak, ita tinan-tinan eleisaun hela de’it,” katak nia.