Purtantu, Eis Prezidente Republika no Eis Primeiru Ministru tama área serimonia akompaña ho kultura tebe-tebe hanesan konvidadu sira seluk.

Tuir observasaun Jornalista INDEPENDENTE, depois Primeiru Ministru, Kay Rala Xanana Gusmão hato'o diskursu, Sekretáriu Jerál Partidu FRETILIN, Marí Alkatiri tuur iha tenda laran, iha parte liman karuk ‘doko ulun’.

Hafoin diskursu Primeiru Ministru nian palku hotu, depois fila-fali  ba tuur nian fatin, konvidadu internasional no nasionál  hamriik hodi simu, maibé Lideransa FRETILIN na’in rua la hamriik, maske konvidadu haleu sira  hamriik hotu.

Depois remata diskursu, Master of Cerenomy (MC) hahú bolu, Primeiru Ministru, Kay Rala Xanana Gusmão, Prezidente Repúblika, José Ramos Horta, Reprezentante Prezidente Tribunál Rekursu, Prezidente Parlamentu Nasionál, no Sekretáriu Jerál ONU, Antonio Guterres, Xefe Miasaun UNAMET, Ian Martin, sira hahú haleu meja hodi koa dose no loke sampanha, nune’e Lú Olo ho Alkatiri kontinua tuur hodi akompaña prosesu.

Nune’e, iha sesaun ko’a dose no loke sampanha,  Xanana foti dose  no tua oferese ba konvidadu ida Japaun tuur kedan ho Lú OLo ho Alkatiri nia kotuk, maibé la oferese ba sira na’in rua ne’ebé tuur hela.

Haree ba situasaun ne’e, Prezidente Repúbliku, José Ramos Horta no Prezidente Parlamentu Nasionál, Maria Fernanda Lay  foti tua no dose oferese ba líder nain-rua, maibé sira na’in la simu, entaun líder orgaun soberania na’in-rua hakat liu fó ba konvidadu sira seluk.

Hafoin ida-ne’e, lider nain rua deside hamriik husi fatin serinomia hodi fila ba uma, maske serinomia seidauk hotu.

Bainhira atu hakat sai husi fatin serimonia sai ba li’ur, jornalista sira tenta  husu mensajen relasiona komemorasaun  tinan 25 konsulta popular, maibe líder nain-rua lakohi fó komentariu.

Maibé Alkatiri hatan ba Jornalista sira katak mensajen mak ohin Primeiru Ministru Kay Rala Xanana Gusmão hato'o ona iha nia diskursu.

Iha fatin seluk, Ámbitu komemorasaun loron aniversáriu dala-49, Organizasaun Popular da Mulher Timor (OPMT), Sekretáriu Jerál Partidu FRETILIN, Marí Alkatiri hatete, diskursu 30 Agostu kalan iha estadium ni’an ne'e ema ida mesak mak liberta povu.

“Povu mak sei kore nia aan, ita tenke hatene iha povu nia leet, hamutuk ho povu lori povu ba naroman ne'e mak ita nia funsaun, se povu kore nia aan, ita mós sei kore ita nia aan, bainhira dehan mudansa mentalidade ne'e iha prosesu ida-ne'e, ita hamutuk ho povu, atu hasai povu husi kiak no mukit. La'ós lulun povu ne'e ba leten, sobu ninia uma hotu, tanba halo de'it estrada oi-oin hanesan projetu emerjénsia,” Diskursu Sekretáriu Jerál Fretilin, Alkatiri, Ámbitu Komemorasaun loron OPMT bad ala-49, iha CCF, Sabadu (31/08).

Iha fatin hanesan, Prezidente Partidu FRETILIN, Francisco Guterres ‘Lú Olo’ haktuir, diskursu sira-ne'ebé halo iha loron 30 agostu loron konsulta populár nega kompletamente istória FALINTIL ninian no se bainhira nune'e Timor-Leste sei nafatin fahe malu, liu husi própriu ida seluk konta nia terus, ida seluk sei konta ninia osan, Timor-Leste sei sai hanesan ne'e.

“Ha'u hanoin ita tenke tau istória ne'e iha ida-idak nia fatin, atu hatene ida-idak nian. Se ita liberta ona pátria, hakarak atu liberta povu, povu ida ne'e sei terus nafatin ita bele hamriik iha palku leten halo diskursu bo'ot, naruk, barak tebe-tebes hahi de'it povu ida ne'e to'o lalehan, maibé horsehik (30 agostu) ne'e ita fó hela rai rahun ba ita nia povu, horsehik de'it ita halo buat oin seluk, ohin ita taka ho ita nia diskursu, atu bele lori ema sira seluk ka bainaka husi rai seluk mai hodi apresia dehan buat hotu la'o di'ak, maibé buat hotu la di'ak iha ita nia ain okos,” Haktuir Lú Olo.