Ho kazu mate foun ne’e, total kazu mate tan dengue iha Timor-Leste sa’e ona ba na’in 44. Enkuantu númeru kazu dengue sa’e ba 3.591.
Tuir dadus husi Ministériu Saúde, kazu mate ne’ebé rejista mai husi munisipiu sia no Rejiaun Administrativu Espesial Oekusse Ambeno.
Munisipiu Dili rejista kazu mate boot liu ho kazu 23, Kovalima na’in 6, Ermera na’in 4, Aileu na’in 2, Ainaru na’in 2, Vikeke na’in 2, Bobonaru na’in 2, Likisa na’in 1, Manufahi na’in 1 no RAEOA na’in 1.
"Iha fulan Marsu loron tolu nia laran de'it, kazu Dengue oho tan labarik na'in lima, ne'ebé kazu mate hamutuk hotu 44 ona, númeru hirak ne'e rejista makas liu iha Dili," informa MS liu husi karta komunikadu ne’ebé Jornál INDEPENDENTE asesu, Sabadu (25/03).
Entretantu, ba kazu dengue, MS informa, husi total kazu 3.591 ne'e maioria rejista iha Dili ho kazu 2.389, Baukau kazu 221, Manatutu kazu 164, Manufahi kazu 151, Lautém kazu 121, Kovalima kazu 121, Likisa kazu 101, Ermera kazu 90, Aileu kazu 85, Vikeke kazu 58, Ainaru kazu 43, Bobonaru kazu 43 no RAEOA kazu 4.
Ba kazu iha Dili, MS informa, Postu administrativu Dom Aleixo rejista númeru boot liu ho kazu 1,330, Kristu Rei ho kazu 413, Na’i Feto ho kazu 310 no Vera Kruz ho kazu 265.
"Ne’e hatudu katak kada loron kazu espalla nafatin ba iha postu administrativu sira seluk," MS afirma.
Ho nune’e, MS kontinua husu ba públiku atu aprezenta aan iha fasilidade saúde sira ne’ebé besik bainhria sente isin-manas ka laran sa’e, liman no ain sikun moras atu bele hetan atendimentu husi médiku sira.
“Husu mós ba autoridade munispiu inklui lokais atu bele orienta komunidade hala’o limpeza jeral iha idaidak nia suku inklui aldei tomak, fase tanke, bidon ka balde semana ida dala ida, limpeza roda aat sira, vazu aifunan atu susuk labele natolun,” MS apela.
