Iha okaziaun ne’e, Ezpoza Prezidente Repúblika simu prémiu husi kategoria Feto inspiradora ne’ebé nomeia husi Amazon Watchs ba servisu no inspirasaun sira durante Espoza Prezidente Repúblika hala’o iha Timor-Leste.

Iha diskursu agradesimentu Espoza Prezidente hato’o onra boot tanba mai simu prémiu ida ne’e.

“Ha’u Agradese ba ita boot sira nia fiar hodi selesiona ha’u ba prémiu ida ne’e liuliu ba señor Ken Giami, Komisaun Organizadora no mós Kandidatu sira seluk ne’ebé ha’u iha oportunidade koñese liu husi partisipasaun ida-ne’e,” nia hateten, iha komunikadu.

Prémiu ne’e nu’udár rekoñesimentu ba feto Timor nia servisu no mós responsabilidade boot ba Cidália atu aprezenta ba mundu knaar feto Timor halo hodi kontribui ba dezenvolvementu Timor Leste ne’ebé hanesan no inkluzivu.

Nia mós haksolok tanba programa ne’ebé nia hala’o loron ruma bele inspira feto maluk seluk hanesan nia temi bebeik iha Timor Leste. 

Espoza Prezidente Repúblika hakarak kontinua hatutan no haforsa feto, labarik  no ema sira ne’ebé laiha kbiit atu hato’o sira nia lian, nune’e sira bele sente katak sira partense ka sai na’in ba prosesu dezenvolvementu nasaun foun ida Timor Leste.

“Dame ne’e posivel, maske lori tempu naruk atu atinji. Atu hetan dame persija ema hotu nia komitmentu no responsabilidade, labele lakon esperansa, labele hakiduk tamba ha’u fiar dame buat ida ne’ebé ami bele hetan. Nune’e feto no ema iha fatin seluk bele hetan ida idak nia fatin,” nia heteten.