Diretor Serbisu Edukasaun Munisipiu Ermera Marcos Soares husu nafatin ba MEJD, atu nune’e bele distribui kaderneta bá sira hodi bele prienxe estudante sira nia valór bainhira ezame remata.
“Durante tinan barak ona maioria ita nia estudante sira iha munisipiu Ermera kompostu husi ensinu pre-eskolar to’o ensinu sekundária jeral sira laiha kaderneta escolar. Ho Ida ne’e ita hakarak iha tinan ida ne’e, MEJD tenke distribui netik kaderneta balun mai, nune’e sira ezame hotu ita bele prienxe sira nia valor iha kaderneta, liuliu ita nia estudante 1.016 ne’ebé mak to’o agora seidauk hetan kaderneta eskolar,” nia hateten via telefonika, Kinta (24/03).
Totál estudante iha munisipiu Ermera ba tinan 2021 hamutuk 47.758 kompostu husi ensinu pre-eskolar hamutuk 2.135, ensinu Báziku Sentral hamutuk 34.261, Ensinu Sekundária Jerál 8.344 no Ensinu sekundária tékniku vokasional hamutuk 3.018.
Antes ne’e Diretor Jerál no Administrasaun Finansas Antoninho Pires informa ona katak, distribuisaun kaderneta ne’e MEJD halo uluk ba ensinu báziku 1,2 siklu (EBF) sira, bainhira remata sei kontinua distribui ba EBC no ESG sira, maibé sei iha prossesu hela.
