Enkuantu, selebrasaun loron mundial saúde matan ne'e ho topiku “Hadomi ita nia matan iha servisu fatin".

Xefe Departamentu Matan Julia Rozalina Xeizas Magno hatete, iha loron 12 fulan outobru HNGV komemora loron mundial matan ho objetivu atu hafanun ema ida-idak hodi fó atensaun no fó importansia ba saúde matan ne’e rasik, oinsa proteje no prevene ema ida-idak nia matan husi moras matan.

“Hanesan previleziu boot ida mai iha departamentu matan no maluk ekipa matan sira husi munisipiu, ami bele hola parte iha tinan ida ne'e hodi halo escreaning no fó konsulta ba iha komunidade sira iha Manleuana,”dehan nia iha Merkadu Manleuana, kinta (12/10).

Iha biban ne'e, Vise-Ministru Saúde ba Opresaun Óspitalar, Flavio Brandão hatete, presiza resolve problema matan tanba TL iha pursentu ualu-nolu (80%) ne’ebé sei iha problema ho matan, hanesan, lahare no balun haré la mós.

“Agora ba oin tenki fó konfiasa ba servisu saúde sira, persiza ita boot sira hakbesik an ba sira hodi bele presta diak liu tan, no fiar katak dezenvolvimentu matan ne'ebé agora la'o dadauk ho parseiru sira, sei solusiona problema matan ne'ebé ita nia inan-aman sira infrenta iha tempu naruk,” dehan Vise-Ministru.

Tanba ne’e, Governante ne’e husu ba pasiente sira liliu inan-aman sira atu labele hakfodak tanba iha HNGV iha ona sentru nasionál matan ne'ebé di'ak liu, hodi fó asistensia gratuita ba pasiente sira.