Tuir dadus husi Departamentu Vijilansia Epidemolojia, Ministériu Saúde, iha 16 Marsu, kazu dengue sa’e ona ba 3,188 husi 3,149 ne’ebé rejista iha 15 Marsu ne’e. Signifika iha loron ida nia laran ema na’in 39 mak sofre dengue.

Husi total kazu ne’ebé rejista iha 16 Marsu, tuir dadus ne’ebé jornal INDEPENDNETE asesu, horseik, munisipiu Dili rejista kazu 2.123, Manatutu kazu 164, Manufahi kazu 134, Baukau kazu 125, Kovalima kazu 114, Lautem kazu 110, Ermera kazu 90, Likisa kazu 98, Aileu kazu 85, Vikeke kazu 57, Ainaru kazu 43, Bobonaru kazu 42 no RAEOA kazu 3.

Enkuantu, total kazu mate tanba dengue mantein ema na’in 35 ne’ebé rejista husi munisipiu sia iha teritoriu nasionál.

Munisipiu hirak ne’ebé rejista ona kazu mate mak munisipiu Dili na’in 18, Ermera na’in 4, Kovalima na’in 5, Aileu na’in 2, Ainaru na’in 2, Baukau na’in 1, Manatutu na’in 1, Manufahi na’in 1 no Vikeke na’in 1.

Ba kapital Dili ne’ebé rejista kazu aas liu, postu administrativu Dom Aleixo kontinua rejista kazu dengue aas ho kazu 1,158, Kristu Rei ho kazu 395, Na’i Feto ho kazu 281 no Vera Kruz kazu 244.

“Husi kazu ne’e hatudu kada loron kontinua sa’e maka’as iha Dili laran, nune’e loron ba loron kazu sei espalla nafatin ba iha postu sira seluk,” informa MS liu husi komunikadu.

Entretantu, iha 15 Marsu, MS rejista ema na’in 3,149 mak sofre dengue.

Husi númeru ne’e, munisipiu Dili rejista kazu 2,091, Manatutu kazu 164, Manufahi kazu 128, Baukau kazu 125, Kovalima kazu 113, Lautem kazu 104, Ermera kazu 90, Likisa kazu 89, Aileu kazu 85, Vikeke kazu 57, Ainaru kazu 43, Bobonaru kazu 42 no RAEOA kazu 3.

Ho kazu ne’ebé kontinua aumenta, MS husu ba públiku hotu atu aprezenta aan iha fasilidade saúde sira ne’ebé besik bainhria sente isin-manas ka laran sa’e, no liman no ain sikun moras, atu bele hetan atendimentu husi médiku sira. 

“Husu mos ba autoridade munispiu inklui lokais atu bele orienta komunidade hala’o limpeza jeral iha idaidak nia suku inklui aldei tomak, fase tanke, bidon ka balde semana ida dala ida, limpeza roda aat sira, vazu aifunan atu susuk labele natolun,” MS apela.