Membru governu dahuluk ne’ebé hetan ona karta ezonerasaun husi Primeiru Ministru Taur Matan Ruak mak Sekretariu Estadu Asuntu Kombatentes Libertasaun Nasionál, Gil da Costa ‘Oan Soru’.

Horseik, PM Taur informa katak, iha tan membru governu na’in haat mak sei hetan ezonerasaun.

Ba membru governu ida ne’ebé sei hetan ezonerasaun, PM Taur lakohi fó sai naran, maibé hatete de’it katak depois mak hatene.

"Emprinsipiu membru governu na'in haat ida hanesan ne'e karik, maibé orsida defenitivamente bainhira toma posse ita-boot sira hatene ona na'in hira," dehan PM Taur ba jornalista sira hafoin enkontru semanál ho Prezidente Repúblika Francisco Guterres Lú Olo, iha Palasiu Prezidensiál Bairu-Pite, Kinta (17/03).

Xefe Governu ne’e hatutan, bainhira to’o nia tempu públiku sei hatene membru governu ne’ebé ezonera.

Molok ne’e, liu husi kampaña kandidatu Prezidente Repúblika númeru 14, José Ramos Horta, iha kampu futebool Likisa Vila, munisipiu Likisa, Segunda (14/03), Oan Soru informa kona-ba ninia ezonerasaun.

Oan Soru hatete, nia simu ona karta ezonerasaun husi PM Taur hodi husik kargu nu’udar SEAKLN.

“Aproveita ba ita-boot katak hahú ohin ha’u la’ós ona sekretáriu estadu, ha’u ezenoradu ona husi Primeiru Ministru, tanba ne’e ha’u bebas, ha’u livre.”

“Ohin dader ha’u ba hasoru Ministru ba Asuntus Kombatentes Libertasaun Nasioná (Júlio Sarmento da Costa ‘Meta Mali’), ‘Ministru, ha’u-nia karta ezonerasaun mak ida ne’e, com lisensa, halo servisu di’ak’,” dehan nia.

Maske nune’e, nia hatutan, nia agradese ba nia Xefe Governu ne’ebé ho laran-luak bele ezonera nia no agradese ba Xanana ne’ebé uluk lori nia sai membru governu atu ajuda prepara politika ruma iha governasaun ne’ebé sabraut ne’e.

Nia dehan, bainhira CNRT sai husi governu, Xanana haruka nia sai maibé nia lakohi ho razaun hakarak aprende uitoan saida mak agora daudauk iha ukun ne’e nia laran.

“Ita-boot sira rona didi’ak, programa oitavo governu ne’ebé aprova iha parlamentu nasionál, nein satu sen, oitavu governu la halo,” nia hatete.

Oan Soru esplika mós razaun CNRT vota abstensaun Orsamentu Jerál Estadu, tanba PM taur la halo tuir konferensia dala 3 Aliansa Mudansa ba Progressu (AMP) nian.