Xefe Sekretáriu Relasaun Externa, Autoridade Protesaun Sivil, Nelson Nunes de Orceans informa, durante loron hitu APS rejista uma-kain 27 iha munisipiu neen mak sofre dezastre naturais.
Munisipiu neen ne’ebé afeta dezastre naturais mak hanesan Munisipiu Baukau, Bobonaro, Kovalima, Lautem, Manatuto, Manufahi, no Vikeke.
Iha Baukau anin sobu uma ida; iha Bobonaro anin sobu uma rua; iha Kovalima anin sobu uma ida; iha Lautem ahi haan uma ida; iha Manatuto anin sobu uma lima; iha Manufahi uma 14 mak sofre inundasaun; no iha Vikeke anin sobu uma tolu.
“Iha Vikeke mak ema ida lakon vida,” informa Nelson, liu husi konferensia imprensa, iha edifisiu APS, Kaikoli, Segunda (29/04).
Bainhira akontese dezastre, nia dehan, Komandu APS ho parseiru relevante forñese asisténsia emerjénsia ba família afetadus, evakua vítima sira ba fatin ne'ebé seguru no ajuda kedas sasan emerjénsia hanesan aihan no la’ós aihan.
APS, nia hatutan, halo ona levantamentu no verifikasaun ba uma hirak ne’ebé afeta husi dezastre naturais.
“Ami husi Autoridade Protesaun Sívil halo ona levantamentu dadus, hafoin entrega ba iha nasionál atu bele rekolla dadus atu ba loos parte ida ne'ebé, hanesan tipu tolu: aat total, aat natoon no aat kaman.”
Entretantu, tuir dadus husi Sentru Nasionál Operasaun Protesaun Sívil (SNOPS) vitima afetadus ba dezastre naturais husi fulan Janeiru to'o 29 Abríl tinan ne'e, ne’ebé hetan ona apoiu rekuperasaun hamutuk uma-kain 309 iha Munisípiu Ainaro, Manufahi, Lautém no Ermera.
