Tuir observasaun jornalista jornal INDEPENDENTE nota katak, maske maioria transporte públiku la halo ona operasaun maibé iha mikrolete balun mak kontinua hala'o operasaun.

Mikrolete balun ne'ebé sei hala'o operasaun mak mikrolete 03 no 010 ne'ebé halai ba dirasaun Komoro-Bidau, no mikrolete ida de'it ne'ebé hala'o operasaun ba dirasaun Bekora-Merkadu Antigu mak sei halo operasaun.

Maske nune'e, mikrolete sira ne'e hala'o operasaun to'o meudia de'it, tanba pasajeiru ida-rua de'it mak sa'e.

Enkuantu mikrolete ne'ebé halai ba dirasaun Taibesi-Bidau, Delta-Audian, Manleuana-Taibesi, Ailok-Laran Taibesi, la halo operasaun.

Kondutór ida iha dada-lia ho Jornalista Jornál INDEPENDENTE iha area Fatuhada bainhira ense mina, dehan katak posibilidade hahú aban ba oin nia sei la halo ona operasaun.

“Ami mai ense mina mós aban ami la halai ona, ense tiha depois karreta ne’e ba entrega ba patraun, ha'u ba hela hakmatek iha uma tanba tauk karik forsa konjunta ruma bandu," dehan kondutór ne'e, Sábado (28/03).

Entretantu, einjeral movimentu transporte iha kapital Dili kontinua la'o maske la hanesan baibain no maioria loza iha kapital Dili la hala'o atividade negosiu.

Supermekadu no loza kiik balun mak sei loke hodi atende konsumedór sira atu sosa sira-nia nesesidade.

Iha mós ofisina balun ne'ebé sei loke nafatin hodi atende kliente balun ne'ebé hakarak hadia sira-nia viatura.