Tenente Jeneral Reformadu ne'e hatete, Ministra Edukasaun (ME), Dulce de Jesus iha nia kompeténsia tomak tenki rezolve problema edukasaun, tan ne'e iha fulan-Janeiru nee nia laran labele muda tan ba fulan seluk no labele dehan tenki tuir sistema tanba sistema balun mos la resolve problema.

Lere afirma, ho problema profesór sira ne'ebé iha, estudante sira abandona iha eskola tanba la iha profesór atu hanorin, sé nune'e nafatin sei fó impaktu boot dezenvolvimentu iha Timor-Leste.

“Profesor sira halo greve labarik sira la eskola, ne'e ninia impaktu ba ita-nia dezenvolvimentu, tan ne'e profesór halo oinsá tenki rezolve lalais iha fulan ida ne'e nia laran labele ba tan fulan-Fevereiru,” dehan Tenente Jenerál Reformadu iha nia Rezidensia Faról liuhusi Konferiensia Imprensa, Tersa (23/01).

Lere esplika, tan ne'e husu ba ministra atu rezolve lalais labele sai ukun na'in uza hahalok hodi sakrifika ema sira ne'ebé inosente.

“Tanba de'it ita-nia ukun nia hahalok ita labele sakrifika ema seluk ema ne'ebé inosente. Ezemplu banhira profesór sira la hanorin ita-nia nia oan sira inosente sira mak lori todan, no dezafiu boot ba sira nia fututru,” Lere esplika.

Iha fatin hanesan, Profesór Domingos Ribeiro hatete, Ministériu Edukasaun hasai sirkulár hodi bandu profesór sira ne'ebé kontatratu remata no voluntáriu sira labele hamriik tan iha estudante nia oin atu hanorin.

Nia dehan, dadaun nee iha Eskola Bázika Sentral (EBC) menus profesór estudante balun latama aula tanba iha profesor nain 16 mak la iha no iha Ensinu Sekundariu Nino Konis Santana Gleno profesor 29 mak la iha.

“Maibé Ministra hatete fali katak seidauk iha koñesimentu dehan profesor la iha, entau estudante balun agora nee la tama aula tamba profesor la iha, labarik sira agora vitima dadauk maibé Ministra nia koalia nee tau atensaun ba Edukasaun,” dehan nia.