Iha ninia diskursu, Prezidente Fundasaun Jape Kong Su (FJKS), Tony Jape, sente ondradu bele servi hanesan Prezidente ba FJKS.

Nia dehan, FJKS harii husi ninia aman saudozu Jape Kong Su ka koñesidu ho naran Avo Jape.

“Nia fiar katak Timor-Leste sei alkansa nia potensiál se bainhira koloka no foka liu ba setór edukasaun duke buat seluk. Mehi boot ida husi Avo Jape mak hakarak haree Timor-Leste semo aas liu tán, maibé ida ne'e só bele liu husi dezevolvimentu umanu ka ema nian,” dehan Avo Jape nia oan-mane iha lansamentu FJKS, iha Timor Plaza.

Tanba hakarak TL semo aas liu tan, Tony dehan, Avo Jape kria kampu servisu ba Timor-oan sira.

“Avó Jape ho laran ksolok tebes hakarak kria campo de trabalho ba Timor-oan hotu. Avo Jape servisu makas tebes to’o ikus loke dalan par realiza nia mehi sira. Hodi kontinuasaun ba nia legalizasaun. Ami-nia familia funda FJKS ne'ebé mak forte liu foka ba sektor edukasaun no liu-liu iha sektor turismo no ospitalidade nian,” dehan Tony.

Aleinde ne’e, nia dehan, FJKS mós sei kontinua fó apoiu ka suporta ba funsionamentu ba Jape A Lem Memorial Clinic ne'ebé iha kolaborasaun ho Order de Malta.

“Avo Jape mós fiar ema no fó rede peska nian no mós hanorin sira oinsá atu peska ho di'ak no dala-ruma mós fó ikan ba sira ida ne'e mak FJKS pretende atu halo. FJKS mós iha atu servisu hamutuk ho esperansa opportunidade parte relevante sira par habelar aprendizajen ba jerasaun joven sira no espesial iha setór turizmu no ospitalidade.”

FJKS, nia hatutan, sei asina Memorandu Entendimentu ho Institute of Business (IOB) iha Dili, ne'ebé mak proporsiona empreenderorismu no kompetensia profesionais ba feto no mós ema ho difisiensia sira, iha setor industrial oioin.

FJKS liu husi Dili Development Company (DCC), ne'ebé iha ona kolaborasaun tomak hanesan programa ida ne'ebé finansiadu husi Governo Australia ba dezenvolvimentu no implementasaun kursu agríkola iha Hera.

Iha tinan 2016, familia Jape, liu husi DDC, ho inisiativa halo kolaborasaun boot ida ho Order de Malta atu fornese espasu gratuita ba Klinika estandarte Australian nian. Klínika ne’e konesidu hanesan Jape A Lem Memorial Clinic, presta servisu médiku nian gratuitu ba Timor-oan.

“Projetu ida ne'e importante liu ba Avo Jape iha nia vida tomak, ho intensaun FJKS nafatin kontinua apoiu klinika ne'e,” Tony dehan.

Vizaun FJKS nian mak atu kapasita povu Timor-Leste, nune’e FJKS espera bele estabele tan programa barak liu iha futuru ho intervenientes no parte interesada no relevante sira.