Prezidente Parlamentu Nasional, Maria Fernanda Lay, hateten, eleisaun Komisariu KAK ita adia ba semana oin ho razaun kuorum katak, tanba bankada CNRT iha deputadu balun sai ba halo Check-Up, ne'ebe ita hein sira mai, semana oin mak ita halo eleisaun.
"Ohin ha'u temi iha plenaria ha'u altera tiha ajenda ohin ninian, ha'u tau fali lei ne'ebe ha'u fo baixa, tanba razaun tekniku. Ohin ha'u hatete kuorum la to'o ne'ebe ha'u hanoin kourum 3/4 nao tem, ne'ebe 48 deputadu tenke iha, se laiha ha'u labele tau ba votasaun, porque laiha kourum ne'ebe mak lei ezije", dehan nia, ba jornalista sira iha PN, Tersa (05/03).
Nia dehan, adia eleisaun ne'e tanba deputadu balun la prense kourum ho razaun tekniku, tanba ne'e klaru katak, Iha semana oin fulan Marsu 2024 mak sei tau ajenda ba eleisaun komisariu KAK.
"Sim, klaru ba semana oin, ohin ha'u temi klaru iha plenaria, ita bo'ot sira la rona,ha:u temi klaru ne'ebe laiha buat mak ami subar", Maria Fernanda Lay hateten.
Hatan karik bankada CNRT no FRETILIN iha ona konsensu?, Prezidente Parlamentu Nasional ne'e haruka jornalista sira atu konfirma ho prezidente bankada rua ne'e.
"Bom ita bo'ot husu ba Prezidente bankada, tanba sira mak halo negosiasaun, ha'u inteven kuandu nesesariu, mais se la'e bankada mak tenke halo negosiasaun", katak nia.
Iha fatin hanesan, Prezidente Bankada CNRT, Duarte Nunes, hateten, la prense kourum ne'e la'os husi CNRT deit, maibe bankada FRETILIN mos husu adia eleisaun refere.
"Ami mos ami nia deputadu balun seiduak mai, entaun ha'u ho Prezidente Bankada FRETILIN Aniceto Longuinhos Guteres ami konkorda malu atu adia eleisaun ne'e, ami ko'alia ba malu tanba tenke konsensus hotu-hotu ba para vota, ida-ne'e ha'u kontaktu ona Prezidente Bankada FRETILIN ami ko'alia ona", nia dehan.
Duarte hatutan, la'os bankada CNRT no FRETILIN laiha konsensus, maibe nia kontaktu Prezidente Bankada FRETILIN ho intensaun atu halo konsensu ba eleisaun.
"Atu halo konsensu ne'e hotu-hotu tenke prezenti,entaun prezente bankada FRETILIN mos telefone ona hau katak, ita adia tiha lai hare tok lai semana oin mak ita avansa ba eleisaun", nia esplika.
Nia haktuir, konsensu ne'e deputadu hotu-hotu tenke mai hotu iha Parlamentu Nasional, nune'e bainhira ajenda ba eleisaun ne'e deputadu hotu-hotu fo votus ho konsensu, intensaun hotu-hotu hakarak dun ema-ne'e.
"Maibe ohin ami nia deputadu balun seiduak mai, entaun ami konkorda malu para adia ba semana oin. Ami nia deputadu Na'in 4, maibe ami konkorda bain-hira avansa ba eleisaun ami bele halo subtituisaun", nia dehan.
Iha parte seluk, Prezidente Bankada PLP, Maria Anjelina Lopes Sarmento, hateten, kona-ba kandidatu komisariu KAK nian ninia prosesu ne'e la'o kleur demais los ona.
Tanba ne'e nia dehan, bankada PLP sei hare kandidatu se mak propoin husi bankada CNRT atu lidera instituisaun KAK ne'e. Infelismente ajenda ida nee adia bebeik hela de'it, razaun adia tanba saida.
"Ohin Prezidente Parlamentu Nasional pronunsia sai katak, ajenda eleisaun ba komisariu KAK sei adia ba semana oin ho razaun katak, deputadu (CNRT) balun ba halo tratamentu saude no lisensa, entaun sira nia bankada (CNRT) rasik la prense numeru 31 kadeira deputadu atu bele realiza eleisaun ba komisariu KAK", nia dehan.
"Ha'u hanoin bankada oposizaun sira ohin prezensa maioria iha plenaria, inklui bankada PLP ami nain ha'at kompletu, maibe sira (CNRT) tenke maioria, ami bele ezerse direitu votu, maibe bankada governu mak tenke reforsa politika Governu da-sia nian", nia dehan.
Tuir nia, rejime Parlamentu Nasional fo dalan ba deputadu sira bele halo subtitu deputadu seluk, bain-hira Iha asunto ruma urjenti ne'ebe persiza prense kourum atu halo eleisaun.
"Kuandu deputadu labele halo funsaun bele halo subtituisaun mai para atu prense deit hodi bele realiza eleisaun, tanba estadu nia interese no nessesidade urjenti liu, duque interese liu deputadu individu, tanba nia la marka prezensa implika ba kourum atu eleisaun", nia esplika.
Deputadu PLP ne'e lamenta,besik tinan ida ona eleisaun ba komisariu KAK ne'e vakatura ida ke naruk tebes, tanba nia husu atu fo internsaun di'ak no prioridade atu kombate korupsaun.
"Ha'u hanoin KAK hanesan instituisaun ida ne'ebe iha kompotensia tuir lei bele halo intevestigasaun ba krime korupsaun sira defende refere husi Ministériu Publiku tanba nain ba asaun penal, entaun kazu sira nesesita ba KAK persiza lider ida atu bele halo andamentu ba prosesu sira ligadu ho kazu ne'ebe mak pendente", nia hateten.