Tuir estimasaun atividade peska ilegal ne’ebé halo, Timor-Leste hetan prejuizu tokon $250 ba kada tinan.

Kauza husi prejuizu hirak ne’e, tuir Diretór Ezekutivu Forum Organizasaun Naun Governamentál Timor Leste (FONGTIL), Daniel dos Santos, tanba governu lakohi halo investimentu hodi bele asegura rikeza hirak ne’e.

“Ita lakon tanba ministériu agrikultura maka iha problema, tanba ministru la brani halo investimentu, entaun ita lakon,” dehan nia, iha knaar fatin, Kaikoli, horisehik.

Nia dehan, alokasaun Orsamentu Jerál Estadu (OJE) ba agrikultura no peska ki'ik liu, oinsá maka bele proteje riku soin sira. Forsa seidauk iha kapasidade natoon atu asegura tasi tanba ministériu defeza no seguransa ninia osan atu hola fasilidade ba F-FDTL mós laiha.

Ne’e duni, tuir nia, instituisaun rua ne’e defeza seguransa no agrikultura peska tenke halo mekanizmu servisu ne’ebé koordenadu no integradu atu asegura riku soin hotu iha tasi labele lakon.

Atu asegura la'ós ko’alia fali ba públiku, halo asaun hodi asegura. Depende ba polítika governu ho PN brani atu halo investimentu se la halo tinan-tinan TL ko’alia kontinua lakon.

Antes ne’e, Ministériu Agrikultura Peska (MAP), Joaquim Gusmão hateten, difisil kombate peska ilegál iha Tasi Timor, tanba daudaun ne’e laiha ró atu kontrolu ema foti ikan tokon ba tokon kada tinan.

Nia dehan, governu iha kompromisu atu sosa ró tolu maibé tanba redusaun orsamentu tinan 2020 nune’e elimina tiha la sosa ró.

Nia dehan, governu iha inisiativa maibé orsamentu mak la sufisiente. Ne’e duni, buka fali parseria internasionál sira atu ajuda iha parte peska.

Fatin hanesan, Ministru Koordenadór Asuntu Ekonomia interinu, Fidelis Magalhães Leite hateten, tinan ne’e ministériu interiór no ministru defeza iha proposta orsamentu ne’ebé reflete mós planu prioridade asegura tasi territóriu timor hodi redús peska ilegál.