Daudauk ne’e, fundus ne’ebé serteza ona ba konstrusaun aeroportu Komoro daudauk ne’e hamutuk tokon $130.

Ministru José dehan, osan hirak ne’e mai husi imprestimu husi Asian Development Bank (ADB) tokon $100 no governu TL tokon $30.

 “Daudaun osan serteza iha tokon $130, mais konstrusaun aeroportu ne’e rasik presiza valor aproxima tokon $485, halo estimasaun kasar karik besik tokon $500, hanesan investimentu ida que boot,” dehan Ministru José hafoin hasoru-malu ho Primeiru Ministru Taur Matan Ruak iha palasiu governu, Segunda (27/07).

Kona-ba apoiu husi governu Japaun, Ministru ne’e hatete, iha semana kotuk, nia parte halo ona audensia ho Embaixadór Japaun iha Timor-Leste hodi koalia kona-ba apoiu tokon $44 husi governu Japaun, no daudauk ne’e sei iha prosesu nia laran.

Aleinde Japaun, nia hatete, ajensia balun husi Australia mós hakarak fó apoiu, maibé seidauk serteza.

Kona-ba prosesu konstrusaun, Ministru ne’e esplika, ekipa ekipa interministerial  ne’ebé durante ne’e la’o no haree asuntu ne’e update ona sira-nia rezultadu serbisu.

Ho nune’e, nia hatutan, governu mós preve ona orsamentu ba konstrusaun aeroportu Komoro.

Nia hatete, tekniku sira kontinua haree atu nune’e karik konstrusaun la’o duni bele hatudu rezultadu ne’ebé di’ak, iha kualidade no priense rekezitus no padraun aeroportu internasional.

Bainhira aeroportu ne’e di’ak no iha kualidade, sei fasilita di’ak liu tan movimentu transporte aero, no TL mós bele hetan reseita husi ne’ebá.

“Ministeriu Transporte no Telekomunikasaun nia natureza mak oinsa atu rekola reseitas ba kofre estadu, kuandu ita-nia infra-estrutura rasik la favorese atu rekola reseitas, ne’e mós obstakulu”.

Tan ne’e, nia hatutan, importante tebes atu aselera konstrusaun aeroportu Komoro, no tuir planu prosesu konstrusaun sei hahú iha inisiu 2021.

Kona-ba komunidade ne’ebé afetadu husi konstrusaun aeroportu ne’e, Ministru ne’e hatan, komunidade hirak ne’ebé afetadu sei hetan indinimizasaun.