“Kuarezma mak tempu atu ita hetan fila fali rota, ita hetan fila fali diresaun moris nian, Maromak mak ita nia finalidade moris nian. Tanba ne’e fila ba Maromak liu husi Kristu, Nia mak sai ita nia finalidade, objetivu moris nian, mai ita konsistente iha ita nia fiar ho orasaun, Karidade no jejum hodi manan dalan salvasaun nian,” dehan Dom Virgílio Kardeál do Carmo da Silva, SDB, liu husi ómilia misa Kuarta Cinzas, iha Igreja Parókia Katedral Imaculada Conceição, Vila Verde, Díli, Kuarta ne’e (05/03/25).
Kardeál hatutan, ahu kadesan ne’ebé kose iha ema nia ulun, nu’udár sinál ida atu fó hanoin hikas ba ema kona ba lia loos no revela ba ema verdade ida.
“Dala ruma loron tomak, husi dadeer too kalan, ema preokupa liu no duni de’it buat ruma ne’ebé folin laek, hanesan ahu-kadesan ne’ebé anin huu lakon tiha de’it, no buat sira ne’e hotu provizóriu de’it. Podér ohin ema iha, aban bele liu ka lakon fali. Ohin, ema ida susesu, aban nia bele nabeen, tanba ne’e buat hotu la permanénsia ho ema, buat ne’ebé permanénsia mak hahalok di’ak no domin Maromak nian,”tenik Dom Virgilio.
ArseBispo mós haktuir liu tan, dalaruma ema moris iha sosiedade ida ne’ebé nakonu ho kultura aparénsia katak buat ne’ebé ema haree, buat ne’ebé ema halo, buat ne’ebé dala barak halo ema monu ba tentasaun sira no situasaun obriga atu halo tuir buat ne’ebé ema seluk halo, monu ba bosok no finjidu, nune’e, Kuarezma hanesan tempu atu ema liberta nia an husi Iluzaun hodi moris tuir Maromak nia ukun fuan.
“Kuarezma bolu ita, atu fila fali ba buat ne’ebé esensiál, buat ne’ebé importante iha ita nia moris, hanesan Jesus hateten iha Evanjellu oinsá mak ita buka halo didi’ak ita nia pratika moris sira ne’e ho fuan no laran, la ho finjimentu, la ho ipokrizia, kona-ba ezmola, orasaun, jejum no abstinénsia,”
Dom Virgílio Kardeál do Carmo akresenta liu tan katak, kada tinan iha selebrasaun Kuarta Cinzas hodi hahú tempu Kuarezma ka tempu hadera aan, sarani fiar na’in sira sempre rona fila-fila kona-ba orasaun, karidade no jejum ka abstinensia.
Benefisiu husi orasaun, karidade, Jejum ka abstinensia mak liga ema ba realidade ida ne’ebé permanénsia nafatin, katak orasaun liga ema ho Maromak, ezmola lori ema ba nia maluk sira, halo karidade no tulun malu, Jejum no abstinénsia lori ema fila hikas ba nia-aan.
Dom Virgilio Kardeál do Carmo da Silva husu sarani fiar na’in sira hotu, haka’as aan ba, atu iha tempu Kuarezma ka tempu hadera aan ida ne’e, ida-idak kumpre ho fuan mós nia obrigasaun sira hodi moris tuir Santa Kreda nia ukun-fuan no moris tuir Maromak nia ukun fuan sira atu manan moris Santu iha rai ne’e no moris rohan la'ek iha loron ikus.
