Ministériu Saúde sei halo triajen katak, ema sira ne’ebé ba ospitál, karik sira mear, inus metin, fani, kakorok moras, sei halo teste ba sira hodi foti amostra halo teste ba sira no rezultadu negativu hotu.
Agora daudaun iha Dili iha kuarentena obrigatóriu na’in 195 no 109 iha hela auto-kuarentena, iha Suai ita iha kuarentena obrigatóriu na’in hitu no auto-kuarentena na’in rua, Baukau kuarentena obrigatóriu na’in haat no auto-kuarentena na’in ida, Oekusi kuarentena obrigatóriu na’in 21.
Nia hatutan, ema sira agora daudaun ministériu saúde, liuliu pesoál saúde halo atendimentu ba sira.
Nune’e, nia esplika, fatin kuarentena durante ne’e Ministériu Saúde la haree ba padraun husi Organizasaun Mundiál Saúde (OMS), maibé sira husu ba Ministériu Saúde atu prepara fatin ema ida tenke iha kuartu ida no hariis fatin ida.
“Nune’e sira tenke hela mesak para Ministériu Saúde halo atendimentu ba sira, karik sira moras isin manas labele da’et, see iha duni moras Covid ne’e mak Organizasaun Mundiál Saúde husu,” dehan Odete, iha Parlamentu Nasionál, Tersa (28/7).
Deputada Bankada UDT/FM, Isabel Ximenes hatete, Ministériu Saúde presiza relata númeru loloos ba ema sira ne’ebé tama mai, tanba sala situasaun krize taka ona.
Asegura sidadaun iha Auto-kuarentena
ekipa vizilansia Servisu Saúde Munisípiu Dili asegura nafatin sidadaun sira ne’ebé mai husi estranjeiru halo auto-kuarentena iha sira-nia uma.
Diretora Servisu Saúde Munisípiu Dili, Agostinha Seguradu hateten, iha auto-kuarentena iha Munisípiu Dili mai husi sira ne’ebé servisu iha Bayu-undang. Tanba ne’e, parte vijilánsia epidemolojia iha lista kompletu hamutuk ho ekipa vijilánsia nasionál fó sira maka atu bele responsabiliza ba sidadaun sira ne’e.
“Ekipa vijilánsia Semana ida tenke halo kontaktu ho sira no vizita ba sira nia uma atu haree sira-nia kondisaun oinsá” dehan nia, iha knaar fatin, Kaikoli, horisehik.
Nia esplika, sidadaun sira ne’ebé mai husi estranjeiru atu halo auto-kuarentena ema halo pedidu antes sira atu mai. Tanba ne’e, ekipa vijilánsia ba haree uluk ona sira-nia fatin prienxe kritériu ona no ekipa aseita maka sira foin mai. Tanba ne’e, atu garante asegura halo verifikasaun antes ema ne’e mai atu nune’e bele kontrola ho di'ak.
Nia husu mós sidadaun sira ne’ebé halo auto-kuarentena ne’e uza konxiénsia atu bele kumpre protokolu sira ne’ebé iha.
Tuir dadus Ministériu Saúde (MS) nian hahú husi loron 06 Marsu to’o 28 Jullu, ema ne’ebé halo testu laboratóriu hamutuk 3.843 kompostu husi ema na’in 3.801 maka nia rezultadu negativu ona no na’in 18 maka sei hein rezultadu laboratóriu.
Agora daudaun ema ne’ebé halo konfinamentu obrigatóriu hamutuk 227 kompostu husi Dili na’in 195, iha Oekusi na’in 21, Kovalima na’in 7. Ema ne’ebé maka halo auto-kuarentena hamutuk 112 kompostu husi Dili 109, Ainaru 2 no Baukau 1. Ema na’in 2.733 maka pasa ona loron 14 iha konfinamentu obrigatóriu.
