“Ha’u hakfodak uituan, gallon H2O ne’e ha’u foin ba sosa lori mai ha’u nia ferik-oan foin foti kopu ba fui bee atu hemu hetan ular iha laran,”dehan nia iha nia hela fatin Fomento, Domingo (03/09).

Nia konfesa, aqua gallon H2O kontamina ho ular ne’e ba dala rua ona. Fatin sosa aqua gallon ne’e la dok husi nia uma, no siempre troka aqua ne’e semana dala ida.

Tanba ne’e, nia husu ba ministériu relevante liu-liu Autóridade Inspesaun Fiskalizasaun Ekonómia Sanitária Alimentar (AIFESA) atu halo fiskalizasaun ba iha kompaña ne’e.

Hataan ba preokupasaun ne’e, Diretór Operasional AIFESA, Gabriel da Costa hatete, kuandu komunidade sira hetan ona evidensia hanesan ne’e di’ak liu tan atu nune’e AIFESA tuun direta ba iha kompaña ne’e  ninia fabrika  hodi foti bee nia amostra lori ba halo teste iha laboratórium  nasionál  Ministériu Saúde (MS).

“Bee ne’ebé maka foti ona sampel ami sei lori ba halo teste iha fatin rua iha laboratórium Saude no laboratórium Ministériu Obras Públika (MOP) Diresaun Agua no Saneamentu (SAS) nian,” dehan  nia liu husi via-telefone.

Antes ne’e, AIFESA tuun direta ona ba iha kompaña nia fabrika foti ona amostra lori ba halo teste maibé la identifika buat ruma. Maibé Diretór ne’e dehan, konsomedór sira hetan ular ne’e deskonfia konsomedór sira sosa bee ne’e tau tiha iha loron mak bacteria komesa mosu ona no kontamina mós ho ular.

“Ha’u husu ba konsomedór sira bainhira konsome bee kualker aqua hetan ular iha laran labele fakar ne’e hanesan evidensia forte ida ba ita, maibé preokupasaun ne’e ami AIFESA sei la nonok ohin Segunda kedas ami tuun ba fabrika ne’e foti amostra hodi lori ba halo teste iha laboratórium,”dehan nia.

Tuir dadus teste laboratórium nasionál liu husi Diresaun Teknolojia Analise Agua Ambiente (DTAAA) iha 2016 bazeia ba sampel bee moos ne’ebé produz husi kompaña iha teritóriu Timor-Leste, rezulta iha kompaña  haat (4) maka la priense  kriteria  tanba la produz bee ne’ebé maka la saúdavel.

“Kompaña sira iha Dili laran kuaze produsaun bee di’ak hotu, maibé bazeia ba teste ne’ebé ami halo teste hatudu katak iha duni ida ou rua ninia bee gallon aqua no hirak seluk tan ladun di’ak no iha balun iis tahu, tanba sira uza bee husi rai okos,”tenik nia.

Entertantu jornalista INDEPENDENTE ne’e tenta konfirma kompañiaa H2O liu husi via- telefone maibé númeru la ativa.