"Deputadu na’in lima hamutuk ho Vise-Prezidente Parlamentu Nasional na’in rua, asina karta ida hodi hato’o keixa ba Ministeriu Públiku hasoru deputadu CNRT sira, Maria Fernanda Lay, Virginia Ana Belo, Bendita Moniz Magno, Maria Gorumali Barreto, Maria Rosa da Câmara Bisoi, José Virgílio Rodrigues Ferreira, Maria Terezinha da Silva Viegas no Ricardo Baptista, ne’ebé halo áktu fíziku hodi perturba no impede parlamentu nasional hala’o sesaun plenária,"dehan karta komunikadu Impresa, ne’ebé INDEPENDENTE Online asesu,segunda (18/05).
Komunikadu ne'e dehan, Vise-Prezidente Parlamentu Nasional, deputada Maria Angelina Sarmento konsidera asaun sira husi deputadu CNRT ne’e krime, tanba impede ona funsionamentu normal vise-presidente nian atu preside plenariu.
Tanba ne’e, deputadu requerente sira hato’o ona keixa ba Prokurador Jeral Repúblika ne’ebé konsidera áktu ne’e interferência Orgaun Soberania Estadu, Parlamentu Nasional,nia funsionamentu.
Tuir Deputada Angelina katak aktu ne’e hatudu momós blokeia funsionamentu, parlamentu labele hala’o plenária.
“Interferensia ida ne’e konstitui krimi koasaun kontra orgaun konstitusional no perturbasaun ba funsionamentu orgaun konstitusional, ne’ebé tuir Kódigu Penal punidu hanesan estipula iha artigu 204 no 205,”afirma iha komunikadu.
