Iha Tersa (20/09), bainhira udan monu-rai iha menutu balun nia laran de’it fatin balun iha kapital Dili hahú sofre inundasaun.
Prezidente komisaun E, Francisco de Vaconcelos hatete, inundasaun ne’ebé mosu iha Dili laran tanba konsensia husi populasaun sira ba kestaun soe foer.
“Saneamentu sira sobu valeta sira iha Dili hamoos hotu maibé aban nakonu fali ona, tanba disipliña populasaun kontribui inundasaun ba ita,” dehan nia iha PN, Kuarta (21/09).
Maske nune’e, nia hatete, governu sei uza meius hotu-hotu hodi proteze sidadaun sira.
Francisco informa, iha ona proposta rezolusaun númeru 23/V/(4) ba ratifikasaun akordu kompaktu ho Estadu Unidus Amérika ne'ebé sei implementa liu husi Millennium Challenge Korporation (MCC) hodi rezolve mós problema inundasaun.
"Amérika tau millaun $420 no ita-nia millaun $60, ne'e ba halo de'it drainajen, valetas no forsa iha Dili laran sei muda sees hotu, ita-boot imajina ida ne'e, orsamentu boot no projetu boot," dehan nia.
Komisaun, nia dehan, rekomenda atu implementa lalais projetu refere.
“So ke ema mak fó osan, Amérika sira tau osan ne'e mós nia Deputadu sira mak aprova, la'ós ida ne'e de'it, maibé sei liga mós hadi'a bee-moos, boa governasaun, demokratizasaun, ne'ebé estudu iha hotu ona, klaru katak ita sei hasoru dikuldade maibé loron ida sei rezolve situasaun iha Dili laran," nia garante.
Tuir nia, sidade Dili klot ona, ema idaidak halo moru no sei problema boot bainhira tempu udan.
"Ita tenke preparadu ba ida ne'e, agora oinsá espasu iha Dili laran ne'e mak planu urbanu, governu agora prepara ona, balun muda ba Hera, Metinaru,” dehan nia.
Molok ne'e, Ministériu Prezidénsia Konsellu Ministru (MPKM) halo audiénsia ho Komisaun F hodi koalia kona-ba proposta rezolusaun númeru 23/V/(4) ba ratifikasaun akordu kompaktu ho EUA.
Ministru Prezidénsia Konsellu Ministrus (MPKM), Fidelis Manuel Leite Magalhães hatete, audiénsia Públika ho komisaun B Parlamentu Nasionál atu fahe informasaun no esplikasaun kona-ba proposta husi governu ba rafikasaun husi Parlamentu Nasionál ba akordu ho Estadu Unidus Amérika," dehan nia, iha PN, Tersa (13/09).
